Türkmenistanyň Ermenistandaky ilçihanasy küşt ýaryşyny geçirdi
Türkmenistanyň Ermenistandaky ilçihanasy diplomatlaryň arasynda küşt boýunça ýaryş gurnady – diýlip, bu diplomatik wekilhananyň Instagramdaky sahypasynda habar berilýär.
Ermenistan Respublikasynyň DIM-niň we ýurduň diplomatik korpusynyň işgärleri bu intellektual oýunda öz başarnyklaryny görkezdiler.
«Men küşti — iň gowy we peýdaly oýun hasap edýärin», — diýip, Ermenistanyň Küşt akademiýasynyň baştutany Smbat Lpuýan aýtdy we akademiýa üçin ýokary derejedäki myhmanlary kabul etmegiň uly hormatdygyny belledi.
Özüniň gutlag sözünde Türkmenistanyň Ermenistandaky ilçisi Muhammetgeldi Aýazow sport babatynda türkmen-ermeni hyzmatdaşlygynyň ösdürilmeginiň möhümdigini belledi.
Küşt ýaryşy Ermenistan Respublikasynyň Bilim, ylym, medeniýet we sport ministrligi, ýurduň Diplomatik kluby we Küşt akademiýasy tarapyndan bilelikde gurnaldy.
Ýaryşyň ähli gatnaşyjylaryny we ýeňijilerini gutlap, Ermenistanyň Bilim, ylym, medeniýet we sport ministrliginiň wekili Artur Sedrakýan ministrligiň şuňa meňzeş ýaryşlaryň geçirilmegini goldaýandygyny belledi.
ORIENT habarlar
