Türkmen alymy elektrik energiýasyny goşmaça öndürmegiň usulyny teklip etdi
Tehniki ylymlaryň doktory, Türkmenistanyň Ylymlar akademiýasynyň korrespondent-agzasy Rahman Esedullaýew ýurduň çäginde elektrik energiýasyny goşmaça öndürmek üçin ýangyçsyz gurluşlary girizmekligi teklip etdi – diýip, TDH habar berýär.
Alymyň pikirine görä, elektrik energiýasyny ýangyç ýakmazdan, magistral gaz geçirijilerinde we turbalarda, şeýle hem guýudan gaz çykanda emele gelýän basyşyň tapawudyny ulanyp elektrik energiýasyny alyp bolýar. Munda bütin dünýäde belli bolan detander-generator tehnologiýalary kömek edip biler.
Bu tehnologiýa gazyň akymynyň energiýasyny mehaniki energiýa, soňra bolsa —elektrik energiýasyna öwürmäge kömek edýär. Ýurduň tutuş çäginiň dolulygyna diýen ýaly gazlaşdyrylandygyny göz öňünde tutup, energiýanyň şu hili öndürilmeginiň mümkinçiligi uludyr.
Bu tehnologiýa howpsuzdyr, esasy zat bolsa — tebigy gazyň köp mukdaryny tygşytlamaga we daşky gurşawa zyňylýan zyýanly zyňyndylary kemeltmäge ukyplydyr.
ORIENT habarlar
