Türkmen ştangaçysy Albaniýadaky ýetginjekleriň dünýä çempionatynda altyn medal gazandy
Türkmen agyr atletikaçysy Medine Amanowa Durresde (Albaniýa) geçirilýän 2023-nji ýylyňýetginjekler dünýä çempionatynda altyn medal gazandy.
Paýtagtymyzyň Ýokary sport ussatlyk mekdebiniň 17 ýaşly türgen-okuwçysy bu üstünlige 59 kg çenli agram derejesinde çykyş etmek bilen ýetdi. Ştanganygötermegiň iki görnüşiniň jemi boýunça Amanowanyň netijesi - 199 kg: silterläp götermekde 90 kg we itekläp götermekde 109 kg deň boldy.
Kümüş medala ekwadorly Jessika Palasiosa mynasyp boldy – 195 (88+107). Pýedestalyň üçünji basgançagyna Albaniýaly türgen Enkileda Kardža çykdy – 187 (87+100).
Ozal milli ýygyndymyzyň gaznasyna altyn medaly 45 kg çenli agram derejesinde Ogulşat Amanowa getiripdi. Iki görnüşiň jemi boýunça — 71 kg silterläp götermekde we 85 kg itekläp götermekde türkmen türgeni 156 kg umumy görkeziji bilen ýeňiş gazanypdy.
Perhat Bahtiýarow 61 kg çenli agram derejede ýaryşyň wise-çempiony boldy. Ştangany götermegiň iki görnüşiniň jemi boýunça on ýedi ýaşly türgen - 258 kg netije görkezdi (114+144).
Ýetginjekleriň çempionatyna türkmen wekiliýetiniň düzümini 13 adam, şol sanda 9 türgen düzdi. Türkmenistanly agyr atletikaçylar dünýäniň birinjiligi ugrundaky ýaryşda Gurbandurdy Amanowyň we Ahmet Saryýewiň ýolbaşçylygynda çykyş edýärler.
Agyr atletika boýunça ýetginjekleriň çempionaty – IWF howandarlygynda her ýylky geçirilýän ýaryşdyr. Bu gezekki ýaryş 61 ýurtdan 13 ýaşdan 17 ýaşa çenli üç ýüzden gowrak ştangaçyny ýygnady, olar 20 agram derejelerinde medallar ugrunda bäsleşýärler. 25-nji martda başlanan ýaryş 1-nji aprelde tamamlanar.
ORIENT habarlar
