Tatarystanda türkmenistanly talyplaryň gatnaşmagynda Nowruz baýramy giňden bellendi
Tatarystanda türkmenistanly talyplaryň we türkmen diasporasynyň wekilleriniň gatnaşmagynda Halkara Nowruz gününi giňden bellediler – diýip, Türkmenistanyň Kazandaky baş konsullygy habar berýär.
Baýramçylyk çäreleriniň biri Kazandaky aýlawyň çäginde dürli halklaryň wekilleriniň gatnaşmagynda, şol sanda türkmen diasporasynyň gatnaşmagynda gurnaldy.
Myhmanlar üçin dürli halklaryň medeniýetiniň aýratynlyklary, olaryň däpleri we dessurlary bilen tanyşdyrýan sergi açyldy. Öz gezeginde, Tatarystan Respublikasynyň türkmenleriniň Milli-medeni awtonomiýasy türkmen talyplary bilen bilelikde we Türkmenistanyň Kazandaky baş konsullygynyň goldamagynda türkmen halkynyň medeni gymmatlyklaryny, milli egin-eşiklerini we bezeg şaý-seplerini, haly önümlerini beýan edýän dürli zatlary hödürledi.
Türkmen talyplarynyň diwarlygynda şeýle hem Türkmenstanyň Halk Maslahatynyň Başlygy Gurbanguly Berdimuhamedowyň kitaplary bilen tanyşmak mümkin boldy. Bu ýere gelen myhmanlara türkmen palawyny hödürlediler. Milli aýdymlar aýdylyp, türkmen tanslary ýerine ýetirildi.
Çäräniň çäklerinde Nowruz baýramy mynasybetli geçirilen bäsleşigiň ýeňijileri yglan edildi. «Nowruz gözeli» bäsleşiginde türkmenistanly talyp gyz Hesel Garlyýewa ýeňiji boldy. Tatarystandaky türkmen diasporasyndan bolan ýaş gyzyň ýerine ýetirmegindäki Noý Noý atly türkmen milli aýdymy bolsa şowhunly el çarpyşmalar bilen garşy alyndy.
Baýramçylyk çäreleri şeýle hem Kazan (Priwolžýe) federal uniwersitetiniň Filologiýa we medeniýetara kommunikasiýa institutynda, I.N. Ulýanow adyndaky Çuwaş döwlet uniwersitetinde hem geçirildi.
ORIENT habarlar
