Aşgabatda üç iri lukmançylyk merkezleriniň gurluşygyna badalga berildi
Birbada üç sany iri lukmançylyk merkezleriniň — Halkara ylmy-kliniki onkologiýa merkeziniň, Halkara pediatriýa merkeziniň we Stomatologiýa merkeziniň binýatlarynyň tutulmagy şu gün Aşgabatda bolup geçdi – diýip, resmi türkmen metbugaty habar berýär.
Dabaraly çärelere Türkmenistanyň Halk Maslahatynyň Başlygy Gurbanguly Berdimuhamedow gatnaşdy.
Täze döwrebap desgalaryň gurluşygyny Gap inşaat Yatirim ve Dış Ticaret A.Ş. türk kompaniýasy alyp barar. Desgalaryň üçüsini-de 2026-njy ýylda işe girizmek meýilleşdirilýär.
Ozal habar berlişi ýaly, 160 orunlyk Halkara pediatriýa merkezi Aşgabadyň günorta böleginde ýerleşer we Türkmenistanyň Saglygy goraýyş we derman senagaty ministrliginiň Halkara lukmançylyk merkezleriniň müdiriýetiniň düzümine girer.
500 orunlyk Halkara onkologiýa ylmy-kliniki merkezi türkmen paýtagtynyň demirgazygynda Çoganly ýaşaýyş toplumynda, ýokanç Keselleriň öňüni almak we bejermek merkeziniň golaýynda ýerleşer.
Täze Stomatologiýa merkezi, öz gezeginde, Gaýragoýulmasyz tiz kömek merkeziniň gabadyndaky boş meýdançada ýerleşmeli
ORIENT habarlar
