Aşgabatda Türkmen-tatarystan işewürlik forumy geçirildi
Şu gün paýtagtymyzyň “Ýyldyz” myhmanhanasynyň maslahatlar zalynda geçirilen Türkmen-tatarystan işewürlik forumy Türkmenistan bilen Russiýa Federasiýasynyň Tatarystan Respublikasynyň arasynda netijeli hyzmatdaşlygy ösdürmekde nobatdaky ähmiýetli çäre boldy.
Duşuşygyň gün tertibindäki meseleler iki ýurduň, hususan-da, senagat, energetika, oba hojalygy we ulag ulgamlarynda uly söwda-ykdysady we maýa goýum mümkinçiligi babatda Türkmenistanyň hem-de Tatarystan Respublikasynyň pudaklaýyn edaralarynyň we işewür toparlarynyň özara bähbitli hyzmatdaşlygynyň geljegi uly ugurlaryny ara alyp maslahatlaşmagy özünde jemledi.
Tatarystan Respublikasynyň Premýer-ministriniň orunbasary, senagat we söwda ministri O.Korobçenko çykyşynda saglygy goraýyş ulgamynda tehnikalary öndürmek boýunça dünýäde iri kompaniýalaryň biriniň -- “Eýdos-Medisina” kompaniýasynyň Amerikada, Ýaponiýada we Tatarystanda işleýändigini belledi. Kompaniýa şeýle hem Türkmenistanyň ýokary okuw mekdepleri bilen gatnaşyk edýär we bu tehnikalary iberýär.
Türkmen tarapynyň wekilleri häzirki tapgyrda ikitaraplaýyn gatnaşyklaryň ösdürilmeginde gurluşyk senagatynyň aýratyn orun eýeleýändigini bellediler. Şeýle hem energetika, oba hojalygy, ulag ulgamy, maşyngurluşygy hyzmatdaşlygyň geljegi uly ugurlarynyň hatarynda görkezildi.
Hususan-da, duşuşyklaryň barşynda Türkmenistanyň “Halk market” supermarketleriniň söwda toplumy bilen “Naturalnoýe zdorowýe” jogapkärçiligi çäklendirilen jemgyýetiň arasynda hyzmatdaşlyk hakynda şertnama gol çekildi.
