Dubaý şäheriniň myhmanhanalarynda 15-nji martdan hökmany energiýa barlagy girizilýär
15-nji martdan Dubaý şäheriniň ähli myhmanhanalarynda hökmany energiýa barlagy geçirilmeli.
"2023-nji ýylyň 15-nji martyndan başlap, Dubaýdaky her bir myhmanhana uglerod taşlandylarynyň möçberi, elektrik energiýasynyň we suwuň sarp ediliş möçberi we galyndylary ýok etmek (utilizirlemek) bilen bagly işleri barada hasabat bermeli" –diýip, Ýakyn Gündogar Gün senagaty assosiasiýasynyň strategiki geňeşçisi Abhaýjit Sinha “Middle East Energy Dubai” sammitiniň çäklerinde gaýtadan dikeldilýän energiýa çeşmeleri ulgamyndaky taslamalar boýunça geçirilen gepleşikde aýtdy.
Myhmanhanalar her aý energiýa barlagynyň netijelerini Ykdysadyýet we syýahatçylyk müdirligine (DET) tabşyrmaly. Uglerod taşlandylarynyň möçberi belli bir çäkde bolsa, myhmanhanalar sylaglanar, eger çäkden çykýan bolsa, onda olara jerime salynar.
Dubaýyň Ykdysadyýet we syýahatçylyk müdirligi myhmanhana pudagynyň uglerod taşlandylaryny ölçeýji guralyň gaýtadan işe girizilendigini habar berdi. Myhmanhanalara energiýa sarp edilişini kesgitlemäge we netijeli dolandyrmaga mümkinçilik berýän bu gural uglerod taşlandylarynyň çeşmeleri barada maglumatlary häzirki wagt tertibinde yzarlamak üçin täzeden işlenip düzüldi.
Myhmanhanalar her aý elektrik energiýasynyň, suwuň, benziniň, dizel ýangyjynyň, sowadyjylaryň (hladagentleriň), suwuklandyrylan nebit gazynyň we ş.m. sarp edilişi barada maglumat bermeli.
“Energiýa barlagy elektrik energiýasynyň, suwuň sarp edilişini, azyk we azyk däl önümlerden we materiallardan emele gelýän galyndylaryň tonna sanyny ölçemek, taşlandylary dolandyrmak üçin geçiriler. Eger bir otag üçin ulanylýan ýorgan-düşek daşlarynyň, çalgyçlaryň sany köpräk bolsa, diýmek suw hem köp ulanylýar, ulanylýan suwuň möçberi elektrik energiýasynyň hem köp harç edilýändigini aňladýar. Bu bolsa uglerod taşlandylarynyň artmagyna getirýär” – diýip, Sinha düşündirýär.
Kämilleşdirilen uglerod kalkulýatory 2030-njy ýyla çenli Durnukly ösüş maksatlaryna laýyklykda, arassa energiýa pudagynda has giň maksatlara ýetmäge we 2050-nji ýyla çenli BAE-nyň Net Zero strategiýasyny goldamaga gönükdirilen Dubaýyň Durnukly syýahatçylyk başlangyjynyň bir bölegidir.
ORIENT news
