Türkmen wekiliýeti Dubaýda e-commerce boýunça sebitleýin maslahata gatnaşdy
Türkmenistandan wekiliýet «Merkezi Aziýada elektron täjirçiligiň mümkinçiliginden peýdalanmak» atly Dubaýda geçen sebitleýin maslahata gatnaşdy.
Halkara söwda merkeziniň Ready4Trade Central Asia taslamasy tarapyndan guralan üç günlük çäre elektron täjirçilik babatynda sebitleýin hyzmatdaşlygy pugtalandyrmagyň ýollaryny malahatlaşmak, döwlete degişli we hususy pudagyň özara gatnaşyklarynyň mümkin bolan ugurlaryny öwrenmek üçin MA ýurtlaryndan resmi şahslary we işewürligiň wekillerini bir meýdançada ýygnady.
Duşuşykda Artisan Empowerment Hub NOVICA onlaýn platforma badalga berildi, ol Merkezi Aziýadaky senetçilere satuwyň täze wirtual kanallaryny hödürleýär we olaryň harytlaryny bütin dünýädäki müşderilere satmaga mümkinçilik berýär.
Dubaýa amala aşyrylan saparyň barşynda gatnaşyjylar şeýle hem sargytlary ýerine ýetirmek boýunça ýerli merkezleriň işjeňligi bilen tanyşdylar, ol ýerde BAE-niň mysalynda elektron täjirçiligini kämilleşdirmegiň öňdebaryjy tejribesini öwrendiler.
Maslahatda Ýewropa Birleşiginiň BAE-däki ilçisi Andrea Matteo Fontana elektron täjirçiligiň söwdany giňeltmegiň we ykdysady ösüşiň kuwwatly hereketlendirijisi bolup durýandygyny belledi. Ol bäsdeşige ukyply hususy pudagyň ösmegine, sagdyn we açyk maýa goýum gurşawynyň döredilmegine ýardam edýär. Şunuň bilen baglylykda, ÝB-i tarapyndan maliýeleşdirilýän taslama gümrük düzgünleriniň ýönekeýleşdirilmegine we sazlaşdyrylmagyna, şeýle hem serhetara elektron täjirçiliginiň ösmegine ýardam edýär.
BAE-niň daşarky söwda boýunça döwlet ministri Tani bin Ahmed Al Zeýudi duşuşykda Merkezi Aziýa ýurtlaryna olaryň elektron täjirçilik pudagyny ösdürmek ymtylyşlarynda goldaw bemäge taýýardygyny beýan etdi.
Merkezi Aziýadaky elektron täjirçilik senagaty çalt ösýär. IMARC Group analitiki kompaniýasynyň maglumatlaryna görä, 2022-nji ýylda Merkezi Aziýadaky elektron täjriçiligiň bazarynyň möçberi 8 milliard dollara ýetdi. Indiki bäş ýylyň dowamynda elektron täjirçiligiň ösüşiniň jemi ýyllyk depgininiň 25,4% bolmagyna garaşylýar.
ORIENT habarlar
