Türkmenistandan meýletinçiler 3 mln-dan gowrak lirany Türkiýädäki tebigy betbagtçylykdan ejir çekenlere ugratdylar
Türkmenistandan bolan meýletinçiler Türkiýädäki ýer titremesinden ejir çekenlere 3 mln türk lirasyndan gowrak pul ugratdylar. Bu barada 10-njy martda Türkiýäniň Türkmenistandaky ilçisi Togan Oral metbugat üçin beýanatynda habar berdi.
«3 million türk lirasyndan gowrak möçberdäki haýyr-sahawat biziň ilçihanamyz tarapyndan açylan hasaba Türkmenistanyň hoşniýetli raýatlary we biziň raýatlarymyz tarapyndan girizildi» - diýip, Oral habar berdi.
Türkmenistan Türkiýädäki tebigy betbagtçylykdan ejir çekenlere kömek etmek üçin herekete geçen ilkinji ýurtlaryň biridir - diýip, diplomat aýtdy. 7-nji fewralda Gaziantep şäherine 7 lukman, 3 sany saglyk işgäri, şeýle hem 30 tonna derman we lukmançylyk serişdeleri ugradyldy.
10-njy fewralda Gurbanguly Berdimuhamedow adyndaky hossarlyga mätäç çagalara kömek etmek boýunça Haýyr-sahawat gaznasy ýer titreme zolagyna jemi agramy 92 tonna çagalar üçin dermanlary, lukmançylyk serişdelerini, egin-eşikleri we iýmit önümlerini eltip berdi.
Türkiýäniň Aşgabatdaky ilçihanasynyň Türkmenistanyň Gyzyl Ýarymaý jemgyýeti we Zenanlar birleşmesi bilen utgaşyklykda ejir çeken etraplara 7 çadyr, 60 sany ýyladyjy, 20 sany generator, 667 krowat, 6835 ýorgan we ýene-de 23,45 müň tonna ynsanperwerlik kömegi, şol sanda arassaçylyk serişdeleri, egin-eşik we azyk önümleri ugradyldy.
«Öz hökümetimiziň, döwletimiziň we halkymyzyň adyndan Prezident Serdar Berdimuhamedowa, Halk Maslahatynyň Başlygy Gurbanguly Berdimuhamedowa, doganlyk türkmen halkyna, döwlet edaralaryna we birleşmelerine, hususy kompaniýalara, şeýle hem Türkmenistanda ýaşaýan öz raýatlarymyza we Türkmenistanda işleýän türk kompaniýalaryna, olaryň ýolbaşçylaryna we işgärlerine minnetdarlyk bildirmek isleýärin» – diýip, ilçiniň metbugat üçin beýanatynda aýdylýar.
Magnitudasy 7,7 we 7,6 deň bolan soňky 80 ýylda hasaba alnan iň güýçli ýer titremesi 6-njy fewralda Türkiýäniň günorta-gündogarynda bolup geçdi. 46 müňden gowrak adam tebigy betbagtçylygyň pidasy boldy.
ORIENT habarlar
