Türkmen basketbolçylary Litwada okuw-türgenleşik ýygnanyşygyny geçýärler, erkekler topary ol ýerden Amsterdam şäherine ugrar
Türkmenistanyň 3x3 basketbol boýunça erkekler we zenanlar milli ýygyndy toparlary Litwanyň Druskininkaý şäherinde okuw-türgenleşik ýygnanyşygyny geçýärler.
Türkmenistanyň basketbol federasiýasynda ORIENT-e habar berlişi ýaly, häzirki türgenleşik çäresine 16 türgen (her toparda sekiz) gatnaşýar. Ýygnanyşyga erkekler ýygyndy toparynyň tälimçisi Toýly Baýryýew we zenanlar ýygyndysynyň halypasy Yslam Täçmyradow ýolbaşçylyk edýär.
Türgenleşik işeri tamamlanandan soň, zenanlar ýygyndy topary ata watana gaýdyp geler, erkekler topary bolsa Amsterdamda (Gollandiýa) 8-nji martdan 26-njy mart aralygynda geçiriljek halkara 3x3 Pro League ýaryşyna gatnaşar.
Soňra basketbol senenama maksatnamasy 29-njy martdan 2-nji aprel aralygynda Singapurda geçiriljek “Aziýa kubogy 2023” ýaryşynda çykyşlar bilen dowam etdiriler.
Artur PETROSÝANS
