Aşgabatda breýking boýunça Türkmenistanyň çempionaty geçiriler
26-njy fewral, ýekşenbe güni, paýtagtyň "Kopetdag" stadionynda ýurduň Sport tanslary federasiýasy tarapyndan gurnalýan breýking boýunça Türkmenistanyň çempionaty geçiriler.
Çempionat ýurduň çar künjeginden we Aşgabatdan elliden gowrak tansçyny birleşdirer. Düzgüne laýyklykda, ýaryşa gatnaşyjylar ýaş çäklendirmelerine garamazdan, bäsleşip bilerler.
Türkmenistanyň Sport tanslary federasiýasynda ORIENT-e habar berlişi ýaly, çempionat 2024-nji ýylda Parižde geçiriljek Olimpiýa oýunlaryna gatnaşmak üçin ýurduň ýygyndy toparyny döretmekde deslapky tapgyr bolar.
2019-njy ýylda Halkara olimpiýa komiteti breýk tansy boýunça ýaryşlaryň 2024-nji ýyldaky Olimpiýa oýunlarynyň sanawyna goşulmagyny tassyklady. Oýunlar üçin saýlama döwür 2024-nji ýylyň 8-nji iýulynda, Olimpiýa oýunlary başlamazyndan 16 gün öň, tamamlanar.
Iň oňat tansçylaryň Olimpiýa oýunlaryna gatnaşmaga hukuk gazanjak saýlama tapgyry 2023-nji ýylyň sentýabr aýynda geçiriler.
Türkmenistanyň çempionatynda ýeňiş gazanan tansçylar, esasy baýraklardan başga-da, pul baýraklaryny hem alarlar.
ORIENT news
