Gazagystanda ýaşamak üçin rugsatnamany almagyň ýönekeýleşdirilmegi üçin ýurtda zerur bolan hünärleriň sanawy tassyklandy
Gazagystanyň Zähmet we ilatyň sosial goragy ministrligi respublika üçin zerur hünärleriň sanawyny tassyklady, bu hünärleriň eýeleri bolan daşary ýurtlylar ýurduň çäginde ýaşamak üçin rugsatnamany ýeňilleşdirilen görnüşde resmileşdirip bilerler – diýip, edaranyň metbugat gullugy habar berdi.
"Zähmet we ilaty sosial goragy ministrligi tarapyndan ... Gazagystan üçin ylym, saglygy goraýyş, senagat we IT pudagy üçin gymmatly hünärlere eýe bolan daşary ýurt raýatlarynyň respublikada ýaşamak üçin rugsatnama beriljek hünärleriň sanawy tassyklandy", - diýlip, ministrligiň saýtynda ýerleşdirilen habarda bellenilýär.
Metbugat habarnamasynda "Isleg bildirilýän hünärleri bolan daşary ýurtlular ýaşamak üçin rugsatnamany, töleg tölemek mümkinçiligini tassyklamazdan, içeri işler edaralarynda ýeňilleşdirilen görnüşde resmileşdirip bilerler" – diýlip, düşündiriş berilýär. Ýaşamak üçin rugsatnama 10 ýyl möhlet bilen ýa-da daşary ýurtlynyň pasportynyň möhletine görä berilýär.
Talap edilýän hünärleriň sanawyny tassyklamak baradaky buýruk 28-nji fewraldan güýje girýär. Sanawda saglygy goraýyş, maglumat we aragatnaşyk tehnologiýalary, senagat, ylym we beýleki pudaklar boýunça zerur bolan 21 hünär bar.
Bu sanawa – neýrohirurg, gematolog, onkolog, neonatolog, endokrinolog, organiki däl maddalaryň tehnologiýasy boýunça inžener, organiki maddalaryň tehnologiýasy boýunça inžener, farmasewtiki inžener-tehnolog, peýdaly gazylyp alynýan minerallary taýýarlamak boýunça inžener, awiasiýa inženeri, älem ulgamyny enjam we programma üpjünçiligi boýunça inžener, täze enjamlary we tehnologiýany ornaşdyrmak boýunça inžener, lazer enjamlary boýunça inžener, sellýuloza, kagyz, çap we süýüm öndürmek boýunça inžener, lukmançylyk radiohimiýa inženeri, lukmançylyk inžener-fizik, dokma çig malynyň klassifikatory, bakteriolog, IT infrastrukturasy boýunça arhitektor, programma üpjünçiligi boýunça arhitektor we önümçilik okuwynyň ussasy ýaly hünärler girýär.
ORIENT news
