Aşgabatda gylyçlaşma boýunça Türkmenistanyň çempionaty başlandy
«Aşgabat» sport toplumynda kadetleriň we ýetginjekleriň arasynda rapirada, gylyçda we şpagada gylyçlaşmak boýunça Türkmenistanyň çempionaty başlandy.
Ýaryşy gurnaýjylar bolup Türkmenistanyň Bedenterbiýe we sport baradaky döwlet komiteti ýurduň Gylyçlaşma boýunça federasiýasy bilen bilelikde çykyş etdiler – diýip, «Neýtralnyý Turkmenistan» gazeti habar berýär.
Türkmenistanyň çempionatyna ýurduň ähli welaýatlaryndan 150 ýaş türgen gatnaşýar.
Ýaryşyň ilkinji gününde kadetleriň arasynda bäsdeşlik geçdi. «Gylyç» görnüşi boýunça oglanlaryň arasynda Natalýa Anikinanyň ýetişdirýän türgeni Mary şäheriniň 1-nji sport mekdebiniň okuwçysy Guwanç Gurdow öňdelegi eýeledi.
Şpagada çykyş edýänleriň arasynda Balkanabat şäheriniň 1-nji sport mekdebiniň türgeni Tatýana Ýermolaýewanyň ýolbaşçylygynda meşgullanýan balkanabatly Sergeý Torin birinji ýeri aldy. Kenarýaka sebitiniň ýene-de bir türgeni Çynar Goşungeldiýewa «rapira» görnüşinde çykyş edip, iň gowy netije görkezdi.
Ýaryşlar Halkara gylyçlaşma federasiýasynyň (FIE) düzgünlerine laýyklykda geçirilýär. Ýaryşyň netijeleri boýunça iň gowy netijeleri görkezjek gatnaşyjylara medallar we degişli sylaglar gowşurylar.
ORIENT habarlar
