«Матч ТВ» türkmen türgenleriniň gatnaşýan «Aziýanyň çagalary» oýunlarynyň açylyş dabarasyny görkezer
Russiýanyň «Матч ТВ» teleýaýlymy göni ýaýlymda Kemerowo oblastynda (Russiýa) 23-nji fewraldan 5-nji marta çenli geçiriljek II gyşky Halkara sport oýunlarynyň - «Aziýanyň çagalarynyň» açylyş dabarasyny görkezer.
Göni alnyp görkeziliş 25-nji fewralda Aşgabat wagty bilen 14:00-da Russiýanyň «Матч ТВ» teleýaýlymynda bolar. Ol Türkmenistanyň çäginde hereket edýän IPTV-niň alnyp görkeziliş torunda bardyr.
Çäräniň dabaraly açylyşy Kemerowodaky «Kuzbass» buzly köşgünde geçiriler.
II gyşky Halkara sport oýunlary «Aziýanyň çagalaryna» 12 ýurtdan we Russiýanyň sekiz sebitinden 867 sportçy gatnaşar. Ýaryş günleriniň dowamynda ýaş türgenler sportuň 19 görnüşi boýunça medallaryň 273 toplumy ugrunda bäsleşerler.
Türkmen türgenleri iki görnüş boýunça — buzda typmakda we şort-trekde biziň ýurdumyza wekilçilik ederler.
ORIENT habarlar
