Russiýa 2022-nji ýylda tebigy gazyň eksportyny dörtden bir bölek azaltdy we STG-iň iberilişini artdyrdy
Russiýa 2022-nji ýylyň netijeleri boýunça gazyň çykarylyşyny 673,8 mlrd.kub metre çenli, eksporty – 25,1%, 184,4 mlrd.kub metre çenli azaltdy. Bu barada RF-nyň wise-premýeri Aleksandr Nowak “Energetiçeskaýa politika” žurnaly üçin ýazan makalasynda habar berdi diýip, TASS ýazýar.
2021-nji ýylda Russiýada gazyň çykarylyşy 762,8 mlrd kum metre deň boldy, şeýlelikde, peseleşiň derejesi 11,66% barabar boldy. Nowagyň sözlerine görä, çykarmagyň we eksportyň aşak düşmegi Ýewropa ýurtlarynyň rus gazyny almakdan ýüz öwürmekleri hem-de “Demirgazyk akym – 1” we “Demirgazyk akym – 2” gaz geçirijilerinde diwersiýalaryň guralmagy bilen baglanyşyklydyr.
Nowak ýurduň gaz känleriniň meýilleşdirilen ulanylyşa berilmegini dowam edýändigini aýdyp, sözüniň üstüni ýetirdi. “Şol bir wagtda-da ýylyň dowamynda gazyň HHR-ne iberilmegi işjeň artdyryldy. “Sibiriň güýji” gaz geçirijisi boýunça rus gazynyň bir gije-gündizdäki iberilişiniň möçberleri birnäçe gezek artdyrylyp täzelendi. Netijede, “Sibiriň güýji” boýunça Hytaýa gazyň iberilişi 48% artdy we häzire çenli iberilen möçberlerdäkiden iň ýokary derejä – 15,4 mlrd.kub metre ýetdi” diýip, ol aýtdy.
Wise-premýer ýurduň suwuklandyrylan tebigy gazyň (STG) önümçiligini ösdürmäge aýratyn ähmiýet berýändigini belledi. Onuň sözlerine görä, geçen ýyl STG-niň eksporty 7,9% köpeldi hem-de 45,7 mlrd.kub metre ýetdi. “Gazyň dünýä bazary ýokary derejede ählumumy häsiýete eýe bolýar, şoňa görä-de, geljekde ykjamlygy nukdaýnazaryndan suwuklandyrylan gaza has-da uly isleg bildiriler” diýip, Nowak nygtady.
Ol şeýle hem Russiýanyň pudagy tehnologik taýdan ösdürmegiň, ilkinji nobatda – suwuklandyrylan gazyň toplumlaryny döretmegiň üstünde işleýändigini düşündirdi. Şu maksatlar üçin 1 mlrd. rubl bölünip berildi.
ORIENT news
