Ýerewanda ýaşy 50-den ýokary bolan “okuwçylar” üçin kompýuter sowatlylygy kurslary açyldy
Ýerewanda ýaşy 50-den uly bolan adamlar üçin kompýuter sowatlylygy kurslary (muzdsuz) başlandy. “Mir24” teleýaýlymynyň habar bermegine görä, sosial taslamanyň esasy "gahrymanlary" – internet giňişligine uýgunlaşmagy we elektron hyzmatlardan peýdalanmagy öwrenmäge höwes bildirýän uly ýaşly adamlardyr.
Olar sapaklarda internetde film görmegi we elektron kitaplary okamagy, dürli tagamlaryň taýýarlanyş usullaryny we beýleki maglumatlary gözlemegi öwrenýärler. Mysal üçin, ozal hasaplar boýunça tölegleri amala aşyrmak üçin uzakly gün nobata duran bolsalar, indi bary-ýogy kursuň dört sapaynyň dowamynda olar tölegleri onlaýn geçirmegi öwrendiler. Gysgaça aýdylanda, olaryň durmuşyna täze öwüşgin çaýyldy.
Taslamanyň awtorlarynyň pikiriçe, sapaklar ýaşy uly adamlaryň köpüsi üçin wirtual dünýäni “açdy” – olar indi sosial ulgamlarda hasaba durup we özbaşdak ulanyp bilerler, bank hasaplaryny açyp ýa-da kärende tölegi, okuw, kommunal hyzmatlar üçin tölegleri töläp bilerler.
Kurslar tölegsiz we iki aý dowam edýär. Olary Ermenistan-hindi maglumat we telekommunikasiýa tehnologiýalary merkezi alyp barýar. Taslama üstünlige eýe boldy, muňa sapaklara gatnaşmak isleýänleriň sanynyň köplügi-de şaýatlyk edýär. Munuň üçin olar hasaba alynmaly we nobata durmaly.
Merkez Ermenistanyň beýleki sebitlerinde-de kompýuter sowatlylygy kurslaryny açmak meýilleşdirilýär.
ORIENT news
