Aşgabatda Türkmen döwlet binagärlik-gurluşyk institutynyň täze binasy peýda bolar
Türkmenistanyň Gurluşyk we binagärlik ministrligi Aşgabat şäherinde Görogly köçesiniň ugrunda Türkmen döwlet binagärlik-gurluşyk institutynyň täze binasynyň çyzgysyny taýýarlamak we gurluşygy üçin halkara tender-bäsleşigini yglan etdi – diýip, resmi türkmen KHBS-i habar berýär.
Institutyň täze binasynyň gurluşygynyň buýuryjysy bolup Türkmenistanyň Bilim ministrligi çykyş edýär.
Teklipler we ýüz tutmalar 2023-nji ýylyň 7-nji apreline çenli Türkmenistanyň Gurluşyk we binagärlik ministrliginiň Bazary öwreniş we daşary ykdysady aragatnaşyklar müdirliginde şu salgyda kabul edilýär: Aşgabat şäheri, Arçabil şaýoly, jaý 84.
TDBGI ýurduň öňdebaryjy ylmy we okuw merkezleriniň biridir, ol gurluşyk, senagat we energetika ugrundan hünärmenleri taýýarlaýar. Häzirki wagtda ýokary okuw mekdebinde taýýarlygyň 9 ugry boýunça 3 müňden gowrak talyp okaýar.
ORIENT habarlar
