Türkmenistan çagalara niýetlenen ynsanperwer ýükli ýene-de bir uçary Türkiýä ugratdy
Türkmenistanyň Halk Maslahatynyň Başlygy Gurbanguly Berdimuhamedow howandarlyga mätäç çagalary goldamak üçin döredilen Haýyr-sahabat gaznasynyň serişdelerinden Türkiýä kömek etmek başlangyjy bilen çykyş etdi. Bu barada türkmen hökümetiniň anna güni geçirilen mejlisinde habar berildi. Bu kömegiň türkmen zenanlarynyň adyndan hem edilýändigi bellenildi.
Şeýle hem türkmen telewideniýesiniň täzelikleriniň agşamky goýberilişinde ejir çeken maşgalalar hem-de olaryň çagalary üçin niýetlenen zerur serişdeler ýüklenen uçaryň Türkiýä tarap ugur alandygy habar berildi.
Ozal, 7-nji fewralda Türkmenistan derman serişdelerinden, lukmançylyk maksatly enjamlardan we dokma önümlerden ybarat bolan ynsanperwer kömegini uçar arkaly Türkiýä ugratdy. Şeýle hem ýer titremesinden ejir çeken ýerlerde türkmen lukmanlary işleýärler.
ORIENT news
