Türkmen suwuklandyrylan gazy Garagalpagystanyň ýaşaýjylarynyň arasynda mugt paýlanýar
Özbegistan Türkmenistandan muzdsuz iberilen suwuklandyrylan gazy üpjünçiligi pes maşgalalara paýlap başlady. Bu barada «Худудгазътаъминот» kompaniýasynyň metbugat gullugyna salgylanmak bilen, «Газете.uz» neşiri habar berýär.
Suwuklandyrylan gazly demir ýol wagonlary eýýäm Özbegistana geldi. Ýangyç Garagalpagystanyň pes girdejili ýaşaýjylarynyň arasynda paýlanýar.
Kompaniýanyň metbugat gullugynda bellenilişi ýaly, Türkmenistan 2000 tonna suwuklandyrylan gaz iberdi. Onuň 1000 tonnasyny Garagalpagystanyň ýaşaýjylarynyň arasynda, 1000 tonnasyny - Horezm welaýatynda paýlamak meýilleşdirilýär.
Özbegistanyň Energetika ministrligi ozal suwuklandyrylan gazyň mätäç maşgalalaryň arasynda mugt paýlanjakdygyny habar berdi.
Fewral aýynyň başynda Türkmenistanyň Prezidenti Serdar Berdimuhamedow suwuklandyrylan gazy Özbegistana muzdsuz bermek barada karara gol çekdi.
8-nji fewralda, Özbegistan bilen Türkmenistanyň arasynda diplomatik gatnaşyklaryň ýola goýulmagynyň 30 ýyllygy mynasybetli, Özbegistan tarapy Aşgabat şäherine 20 sany “Volkswagen Caddy” tiz kömek ulagyny iberdi.
ORIENT news
