Özbegistan we Hindistan hindi daglarynda harby türgenleşik okuwlaryny geçirerler
Özbegistanyň we Hindistanyň harby gullukçylary Hindistanyň Uttarakhand welaýatynyň daglarynda bilelikde “Dostluk” okuw türgenleşigini geçirerler – diýip, Özbegistanyň Goranmak ministrliginiň metbugat gullugy sişenbe güni habar berýär.
Goranmak ministrliginiň Telegram kanalynda çap eden habarynda "Özbegistandan 45 harby gullukçydan ybarat topar “Dostluk-2023” atly özbek-hindi harby okuw türgenleşigine gatnaşmak üçin Nýu-Delä geldi" – diýlip, bellenýär.
Ministrligiň berýän habaryna görä, türgenleşikler daglyk ýerler bilen häsiýetlendirilýän Uttarakhandyň Pithoragarh etrabynda ýerleşýän hindi harby bölümleriniň biriniň esasynda geçiriler. Bilelikdäki hereketler 5-nji marta çenli dowam eder.
Türgenleşikleriň ssenariýine görä, harbylar şertli terrorçy toparlaryň gözlegi we ýok edilmegi, şeýle hem dag päsgelçiliklerini ýeňip geçmek we daglyk we tokaý ýerlerde harby operasiýalary alyp barmak ýaly wezipeleri amala aşyrarlar.
Häzirki bilelikdäki türgenleşikler Özbegistanyň we Hindistanyň harbylary üçin soňky ýyllarda hasap boýunça dördünji bolar. Ilkinji gezek bu çäre 2019-njy ýylyň noýabr aýynda Daşkent oblastyndaky türgenleşik meýdançasynda, soňra 2021-nji ýylyň mart aýynda - Hindistanyň Ranikhet welaýatynyň jeňňelinde, 2022-nji ýylyň mart aýynda Özbegistanyň demirgazyk-günbataryndaky Horezm oblastynyň çölünde geçirildi.
ORIENT news
