Türkmen tennisçileriniň dünýä çempionatynda gazanan taryhda ilkinji medallary
Türkmenistanyň tennis boýunça ýygyndy topary Şri-Lankada 14 ýaşa çenli ýetginjekleriň arasyndaky dünýä çempionatynyň Aziýa we Okeaniýa sebiti boýunça açyk tapgyrynda (2023 World Junior Tennis Competition) bürünç medallara mynasyp boldy.
Ýaryşyň ýarym finalynda Selim Çagylow bilen Imran Ahundowdan ybarat ýetginjekler ýygyndy topary Singapuryň ýygyndysyndan 2:1 hasabynda ýeňildi. Şeýle-de bolsa, üçünji orun ugrunda çempionatyň ýer eýeleri bilen geçirilen duşuşykda türkmen topary ýeňiş gazandy (2:1).
Türkmenistanyň gyzlar ýygyndy topary hem edil şular ýaly netije gazandylar, ýagny Ilima Guseýnowa we Natalýa Martynowa Indoneziýanyň ýygyndy toparyndan 2:1 hasabynda utulyp, jemleýji (final) tapgyra çykmakdan mahrum boldular. Bürünç medal ugrundaky oýun malaýziýaly gyzlar bilen geçirilip, ol 2:1 hasabynda watandaşlarymyzyň peýdasyna tamamlandy.
Şri-Lankadaky çempionatda gazanylan bürünç medallaryň türkmen tennisi üçin taryhy netijedigini bellemelidiris.
Ýurdumyzyň oglanlar ýygyndy toparynyň kapitany Türkmenistanyň sport ussady, milli derejeli kazy Andreý Dowmatow, gyzlar toparyna Türkmenistanyň öňdebaryjy tennisçisi, at gazanan sport ussady Ýuriý Rogusskiý ýolbaşçylyk etdi. Şri-Lankada ýurdumyzyň wekiliýetine Igor Zubkow ýolbaşçylyk etdi.
Bütindünýä tennis ýaryşy 11-18-nji fewral aralygynda Kolombo şäherinde (Şri-Lanka) geçirildi. Bu tapgyra Bangladeş, Türkmenistan, Şri-Lanka, Indoneziýa, Singapur, Malaýziýa, Nepal, Kamboja, Mongoliýa, Yemen, Gyrgyzystan, Liwan, Makao, Saud Arabystany ýaly 15 ýurtdan iň gowy tennisçiler we Pacific Oceania topary gatnaşdy.
Artur PETROSYANTS
