Ýerewanda Magtymgulynyň 300 ýyllygyna bagyşlanan maslahat geçiriler
Ýerewanda «Magtymguly Pyragy- dünýä medeniýetiniň taryhynda» atly ylmy-amaly maslahatyň geçirilmegi baradaky ylalaşyk Türkmenistanyň Ermenistandaky ilçisi Muhammetgeldi Aýazowyň Ermenistanyň döwlet uniwersitetiniň prorektory Mikael Owannisýan bilen duşuşygynda gazanyldy. Bu barada diplomatik wekilhananyň Instagramdaky sahypasynda habar berilýär.
Beýik şahyryň 300 ýyllygyna bagyşlanan çäre Magtymguly adyndaky Türkmen döwlet uniwersiteti bilen bilelikde Türkmenistanyň Ermenistandaky medeniýet günleriniň çäklerinde guralar.
Duşuşygyň gatnaşyjylarynyň bellemegine görä, Ýerewanyň döwlet uniwersitetiniň professor-mugallymlar düzümi birnäçe gezek Türkmenistana gelip gördüler, türkmen talyplary üçin onlaýn-leksiýalary okadylar. Daşary ýurt talyplaryny çekmekligiň çäklerinde ýokary okuw mekdebi okamak üçin stipendiýa berýär.
Duşuşykda şeýle hem ÝDU-niň halkara hyzmatdaşlyk müdirliginiň baştutany Aleksandr Makarow hem gatnaşdy.
1919-njy ýylda döredilen Ýerewanyň döwlet uniwersiteti ýurduň iň uly we abraýly ýokary okuw mekdebidir. Ol dünýäniň iň abraýly müň uniwersitetiniň sanawyna girýär.
ORIENT habarlar
