Türkmenistan we Ermenistan medeni-ynsanperwer hyzmatdaşlygyň ösdürilmegini ara alyp maslahatlaşdyrlar
Medeni-ynsanperwer ugurdaky gatnaşyklary ösdürmegiň geljegi Türkmenistanyň Ermenistandaky Adatdan daşary we Doly ygtyýarly ilçisi Muhammetgeldi Aýazowyň Ermenistanyň Bilim, ylym, medeniýet we sport boýunça täze bellenen ministri Žanna Andreasýan bilen duşuşygynda ara alnyp maslahatlaşyldy. Bu barada diplomatik wekilhananyň metbugat beýanatynda habar berilýär.
Türkmenistanyň we Ermenistanyň ýokary okuw mekdepleriniň arasyndaky hyzmatdaşlygy işjeňleşdirmek zerurlygyny nygtamak bilen, taraplar häzirki wagtda iki ýurduň ykdysadyýet boýunça ýokary okuw mekdepleriniň we sazçylyk konserwatoriýalarynyň arasynda ylalaşyklaryň taslamalarynyň taýýarlanýandygyny bellediler. Magtymguly adyndaky Türkmen döwlet uniwersiteti bilen Ýerewanyň döwlet uniwersitetiniň arasyndaky ylalaşyklar, şeýle hem dostlukly ýurtlaryň oba hojalygy boýunça ýokary okuw mekdepleriniň arasyndaky ylalaşyklar üstünlikli ýerine ýetirilýär.
Bu ýyl Ýerewanda Türkmenistanyň Ermenistandaky medeniýet günlerini geçirmek meýilleşdirilýär. Şunuň bilen baglylykda, türkmen diplomaty beýik türkmen şahyry-filosofy Magtymguly Pyraga bagyşlanan halkara maslahatyny we konserti guramaklygy teklip etdi, onuň 300 ýyllygy 2024-nji ýylda dabaraly bellenilip geçiler.
Sport babatynda hyzmatdaşlygy giňeltmegiň meselelerine degip geçmek bilen, Žanna Andreasýan türkmen türgenlerini Ermenistanyň sport toplumlarynda kadaly okuw-türgenleşik ýygnanyşyklaryny geçirmäge çagyrdy. Ministr ýurduň iri halkara ýaryşlaryny geçirmegi maksat edinýändigini hem belledi.
ORIENT habarlar
