Türkmenistanyň we RF-nyň saglygy goraýyş boýunça «Ýol kartasy» iki hepdeden taýýar bolar — Prosenko
Lukmançylyk ylymlarynyň doktory, Russiýanyň zähmet gahrymany, Moskwanyň baş anestiozology-reanimatology we Aşgabatda doglan Denis Prosenko Türkmenistan bilen Russiýanyň arasyndaky saglygy goraýyş babatdaky hyzmatdaşlygy ösdürmegiň «ýol kartasynyň» iki hepdeden taýýar boljakdygyny beýan etdi.
«Biz diňe bir nazaryýet tejribelerini alyşman, eýsem tejribedäki başarnyklary hem alyşmak üçin türkmen kärdeşlerimizi öz klinikalarymyzda görmäge şat bolarys», — diýip, Prosenko öňdebaryjy rus lukmanlarynyň Aşgabada eden iş saparynyň netijeleri boýunça «Neýtralnyý Turkmenistan» gazetine beren söhbetdeşliginde habar berdi.
Moskwanyň baş anesteziolog-reanimatologynyň bellemegine görä, türkmen kärdeşleri bilen duşuşygyň barşynda ynsanperwer gatnaşyklar we türkmen lukmanlary bilen aragatnaşyk, klinikalar bilen özara hyzmatdaşlyk etmegiň meýilnamalary we hünärmenleriň mundan beýläkki gatnaşyklary ara alnyp maslahatlaşyldy.
Saparyň barşynda rus hünärmenleri türkmen lukmançylyk uniwersitetine, ylmy-kliniki onkologiýa we enäniň we çaganyň saglygyny goramak merkezlerine, Halkara hirurgiýa merkezine baryp, Türkmenistanyň saglygy goraýyş ulgamyna ýokary baha berdiler.
Hünärmenleri taýýarlamak meselesine degip geçip, Prosenko täze Rus-Türkmen uniwersitetinde «lukmançylyk fakulteti bolmalydyr we bolar» - diýip, habar berdi.
«Lukmançylyk wekiliýetiniň» düzümine Russiýanyň Saglygy goraýyş ministrliginiň orunbasary Tatýana Semýonowa, N. N. Blohin adyndaky Onkologiýa milli merkeziniň direktory Iwan Stilidi, Moskwanyň A. S. Loginowa adyndaky kliniki ylmy-amaly merkeziniň direktory Igor Hatkow we «Kommunarkanyň» anestiozologiýa we reanimatologiýa boýunça ştatdan däşäry hünärmeni Denis Prosenko girdiler.
ORIENT habarlar
