Ýaponiýa Türkmenistan bilen hyzmatdaşlygy öňe sürmäge niýet edýär - ilçi Ýamamoto
Ýaponiýa «Merkezi Aziýa+Ýaponiýa» Dialogynyň çäklerinde Türkmenistan bilen dürli ugurlar boýunça alyş-çalyşy mundan beýläk-de öňe sürmegi niýet edinýär. Bu barada Ýaponiýanyň Türkmenistandaky ilçisi Hiroýuki Ýamomoto Ýaponiýanyň imperatory Naruhitonyň doglan güni mynasybetli dabaraly kabul edişlikde aýtdy – diýlip, diplomatik wekilhananyň metbugat habarynda aýdylýar.
Diplomat şeýle hem günüň dogýan ýurdunyň parahatçylygyň we sebitde durnuklylygyň hatyrasyna Türkmenistan bilen hyzmatdaşlygy dowam etdirmäge taýýardygyny goşdy.
Kabul edişligiň çäklerinde öňdebaryjy ýapon kompaniýalarynyň önümleriniň, şol sanda Itochu Corporation, Kawasaki Heavy Industries, Sumitomo Corporation, Mitsubishi Corporation we Toyota kompaniýalarynyň önümleriniň sergisi gurnaldy, samuraýlar tarapyndan ulanylýan Ýaponiýanyň söweş sungaty bolan budo görkezildi.
Myhmanlar şeýle hem bu Aziýa ýurdunyň tagamlaryny dadyp gördüler – udon (bugdaý unundan edilen ýapon unaşly çorbasy) we moti – tüwiden edilen süýjülik.
Ýaponiýanyň imperatorynyň doglan güni Ýaponiýada döwlet baýaramydyr. 23-nji fewralda 126-njy imperator Naruhito 63 ýaşaýar.
ORIENT habarlar
