Bütindünýä bankynyň baştutany wagtyndan öň wezipesinden gidýär
Bütindünýä bankynyň prezidenti Dewid Malpass öz ygtyýarlyklarynyň möhletiniň gutarmagyna bir ýyldan az wagt galanda öz wezipesinden gitmegi meýilleşdirýär. Özüniň gitmeginiň anyk sebaplerini ol aýtmady.
«Uzak wagtlap pikir edenimden soňra, men başga meseleler bilen meşgullanmagy ýüregime düwdüm» – diýip, BB-nyň baştutany aýtdy.
Malpass 2019-njy ýylyň aprelinde prezident Donald Tramp tarapyndan Bütindünýä bankynyň toparynyň baştutany edilip bellenipdi. Ondan ozal ol ABŞ-nyň Maliýe ministriniň halkara işleri boýunça orunbasary bolup işläpdi.
Bütindünýä bankynyň baştutany Halkara täzeleniş we ösüş bankynyň we Halkara ösüş birleşmesiniň direktorlar Geňeşiniň hem başlygydyr. Guramanyň prezidenti Halkara maliýe korporasiýasynyň (IFC) direktorlar geňeşiniň maslahatlarynda başlyklyk edýär, maýa goýum kepillendirmeleri boýunça Köptaraplaýyn agentligiň (MIGA) we maýa goýum jedellerini kadalaşdyrmak boýunça Halkara merkeziň (ICSID) Dolandyryş geňeşine başlyklyk edýär.
Bütindünýä bankynyň prezidentligine şol bankyň iri paýdary bolan ýurduň - ABŞ-nyň raýaty bolup bilýär. Prezident dolandyryjylar geňeşi tarapyndan bäş ýyllyk möhlet bilen saýlanýar we onuň gaýtadan saýlanmak mümkinçiligi bolýar.
ORIENT habarlar
