Türkmenistan we Belarus sport babatynda hyzmatdaşlygy ara alyp maslahatlaşdylar
Sport babatynda ikitaraplaýyn hyzmatdaşlygy işjeňleşdirmek meselesi Türkmenistanyň Bedenterbiýe we sport baradaky döwlet komitetiniň başlygy Gulmyrat Agamyradowyň Belarus Respublikasynyň Türkmenistandaky ilçisi Wýaçeslaw Beskost bilen duşuşygynda ara alnyp maslahatlaşyldy. Bu barada Belorussiýanyň diplomatik wekilhanasynyň saýty habar berýär.
Taraplar türkmen türgenleriniň Belarus Respublikasynda 2023-nji ýylyň awgustynda boljak GDA ýurtlarynyň II oýunlaryna gatnaşmagy meselesine seretdiler.
Oýunlar diňe bir Minskide däl, eýsem ýurduň ähli oblastlarynda – her oblastyň merkezinde sportyň iki görnüşi boýunça geçiriler. Bu konsepsiýa çärä gatnaşyjylaryň mümkin boldugyça köp sanlysyny çekmäge mümkinçilik berer. Türgenleriň sportuň 21 görnüşi boýunça ýaryşjakdyklaryny belläp geçmek gerek.
Oýunlaryň açylyş we ýapylyş dabarasyny «Minsk-Arena» Sport-dynç alyş toplumynda geçirmek meýilleşdirilýär.
ORIENT habarlar
