Hormatly Prezidentimiz Serdar Berdimuhamedow Russiýa Federasiýasynyň Hökümetiniň Başlygynyň orunbasary Alekseý Owerçugy kabul etdi.
Hormatly Prezidentimiz Serdar Berdimuhamedow Russiýa Federasiýasynyň Hökümetiniň Başlygynyň orunbasary Alekseý Owerçugy kabul etdi.
Myhman hyzmatdaşlygyň möhüm meselelerini ara alyp maslahatlaşmaga döredilen mümkinçilik üçin döwlet Baştutanymyza tüýs ýürekden hoşallygyny bildirip, Russiýa Federasiýasynyň Prezidentiniň hem-de Russiýa Federasiýasynyň Hökümetiniň Başlygynyň mähirli salamyny we iň gowy arzuwlaryny ýetirdi hem-de Russiýanyň Türkmenistan bilen däp bolan dostlukly, hoşniýetli goňşuçylyk gatnaşyklara ygrarlydygyny tassyklady.
Hormatly Prezidentimiz hoşniýetli sözler üçin minnetdarlyk bildirip, Russiýa Federasiýasynyň Hökümetiniň Başlygynyň orunbasarynyň bu gezekki saparynyň ýurdumyzda hökümetara dialogyň dowamy hökmünde kabul edilýändigini belledi. Döwlet Baştutanymyz, Russiýa Federasiýasynyň ýolbaşçylaryna mähirli salamyny we iň gowy arzuwlaryny beýan edip, Russiýa Federasiýasynyň Hökümetiniň ýolbaşçysynyň ýakynda ýurdumyza amala aşyran resmi saparynyň dowamynda geçirilen gepleşikleriň netijeliligini kanagatlanma bilen belledi. Şonda türkmen-rus hyzmatdaşlygyny mundan beýläk-de ösdürmegiň esasy ugurlary kesgitlenildi, resminamalaryň uly toplumyna gol çekildi, şeýle hem bilelikdäki işewürlik forumy üstünlikli geçirildi.
Duşuşygyň dowamynda strategik hyzmatdaşlyk ýörelgelerine esaslanýan we ähli ugurlar boýunça üstünlikli ösdürilýän döwletara hyzmatdaşlygynyň ileri tutulýan ugurlary boýunça pikir alşyldy. Şunda ozal gazanylan we dürli ulgamlardaky netijeli hyzmatdaşlygyň giňeldilmegine täze itergi bermäge gönükdirilen ylalaşyklaryň iş ýüzünde durmuşa geçirilmegine üns çekildi. Söwda-ykdysady ulgamy türkmen-rus hyzmatdaşlygynyň möhüm ugry bolup çykyş edýär. Nebitgaz, ulag, senagat ulgamlarynda we beýleki pudaklarda hyzmatdaşlyk üstünlikli ösdürilýär.
Şunuň bilen baglylykda, hyzmatdaşlygyň bar bolan kuwwatyny doly derejede durmuşa geçirmegiň, ony diwersifikasiýalaşdyrmagyň, özara söwdanyň we maýa goýumlaryň möçberlerini yzygiderli artdyrmak üçin täze möhüm ugurlara çykmagyň, bilelikdäki taslamalary amala aşyrmagyň zerurdygy bellenildi. Ynsanperwer ulgamy hem döwletara gatnaşyklarynyň aýrylmaz we möhüm bölegidir. Bu ulgamda bilim, ylym we medeniýet, saglygy goraýyş, şeýle hem sanly tehnologiýalar ugurlary boýunça däp bolan gatnaşyklar aýratyn orun eýeleýär.
Duşuşygyň ahyrynda hormatly Prezidentimiz hem-de Russiýa Federasiýasynyň Hökümetiniň Başlygynyň orunbasary umumy bähbitlere laýyk gelýän hem-de uzakmöhletleýin geljegi nazarlap, ýola goýulýan özara bähbitli ikitaraplaýyn hyzmatdaşlygyň mundan beýläk-de üstünlikli ösdüriljekdigine ynam bildirdiler.
