Aktauda geçirilen sergide türkmen el halylary görkezildi
16-njy fewral, penşenbe güni Aktau şäherinde ýerleşýän "Nur-Plaza" myhmanhanasynda sergi ýarmarkasy açyldy, sergide dürli ýurtlardan şaý-sepler, haly, keçe we dokma önümleri bar. Türkmenistandan elde dokalan haly we haly önümleri sergide Gazagystanyň Astana şäherinden «Tumar Carpets» ("Tumar halylary") kompaniýasy tarapyndan hödürlenýär. Bu kompaniýa dünýäniň dürli künjeklerinden Gazagystana haly we haly önümleriniň gaýtalanmajak asyl nusgalaryny getirip, ýokary hilli halylaryň söwdasy bilen meşgullanýar.
Gazagystanyň Mangistau oblastynyň sarp ediş bazarynda Türkmenistanda öndürilen diňe bir haly önümleriniň däl, eýsem, ýurdumyzdan miwe we gök önümleriniň, dokma, gurluşyk önümleriniň-de uly islegden peýdalanýandygyny bellemelidiris.
Bahasynyň ýokarydygyna garamazdan, sergä gelýänler tarapyndan türkmen halylaryna uly isleg bildirilýär. Ýarmarkada türkmen halylary bilen birlikde owgan, eýran, azerbaýjan, türk halylary hem görkezilendir.
Sergi-ýarmarkasyna diňe bölek satyjylar däl, eýsem lomaý satyjylar hem baryp görýärler.
ORIENT news
