Aşgabat we Tähran medeniýet ulgamynda hyzmatdaşlyk etmegiň Ýol kartasyny işläp taýýarlar
Sişenbe güni Türkmenistanyň daşary işler ministri Raşid Meredow Eýranyň medeniýet we uslam ugurdaşlygy ministri Mohammad Mahdi Esmaili bilen duşuşdy.
Ministrler Türkmenistanyň prezidenti Serdar Berdimuhamedowyň geçen ýylyň iýunynda Eýrana bolan resmi saparynyň ähmiýetini, onuň dowamynda ylym-bilim gatnaşyklaryny hem-de medeniýet we sungat ulgamynda özara hereketleri işjeňleşdirmäge itergi beren resminamalaryň uly toplumyna gol çekilendigi bellenildi.
Taraplar medeni-ynsanperwer ugrunyň iki halkyň taryhynda, medeniýetinde we däp-dessurlarynda ýakyn özara gatnaşyklara eýe bolan doganlyk türkmen-eýran gatnaşyklarynyň aýrylmaz bölegi bolup durýandygy barada bir pikirdediklerini beýan etdiler diýlip, Türkmenistanyň DIM-niň saýtynda habar berilýär.
Söhbetdeşler medeniýet, ylym, saz we sungat ulgamynda, köpçülikleýin habar beriş serişdeler, teleradiogepleşikler we kinematografiýa, kitap we neşirýatçylyk işi ýaly ugurlar boýunça hyzmatdalygy ösdürmegiň mümkinçiliklerine giňişleýin garadylar.
Magtymguly Pyragynyň doglan gününiň 300 ýyllygyny baýram etmegiň çäklerinde bilelikdäki çaralaeriň geçirilmegine, nowruz baýramy mynasybetli özara çäreleriň amala aşyrylmagyna, iki ýurduň medeniýet we ylym edaralarynyň arasynda göni gatnaşyklaryň ýola goýulmagyna, bu ulgamda şertnama-hukuk binýadynyň pugtalandyrylmagyna, şeýle hem hyzmatdaşlyk etmegiň Ýol kartasyny taýarlamaga üns berildi.
EYR-niň Türkmenistandaky Medeniýet günlerine gatnaşmak üçin Aşgabatda bolýan Eýran wekiliýetiniň baştutany bu çäreleriň dostlugy, hoşniýetli goňşuçylygy hem-de özara hormat goýmagy pugtalandyrmak ýolunda nobatdaky anyk ädim hökmünde çykyş edýändigini nygtady.
ORIENT news
