Türkmenistanda rus dilini öwrenmek boýunça ýörite dil merkeziniň peýda bolmagy mümkin
Türkmenistanda rus dilini öwrenmek boýunça ýörite dil merkeziniň açylmagy Türkmenistanyň Kazandaky baş konsuly Güýçgeldi Garaýewiň Naberežnyýe Çelnynyň Döwlet mugallymçylyk uniwersitetiniň rektory Alfinur Galiakberowa bilen duşuşygynda ara alnyp maslahatlaşyldy. Bu barada baş konsullygyň resmi saýtynda habar berilýär.
Ýokary derejeli hünärmenleri taýýarlamak meselesine degip geçmek bilen, taraplar bu ugurdaky türkmen ýokary okuw mekdepleriniň NÇDMU bilen aragatnaşygy ýola goýmak meselelesini ara alyp maslahatlaşdylar. Galiakberowa Seýitnazar Seýdi adyndaky Türkmen döwlet mugallymçylyk instituty we Türkmenistanyň Milli bilim instituty bilen hyzmatdaşlyga gyzyklanma bildirdi.
Rektoryň sözlerine görä, häzirki wagtda Naberežnyý Çelnynyň Döwlet mugallymçylyk uniwersitetinde 350-den gowrak türkmen talyplary okaýarlar. Türkmenistandan 1 müňden gowrak talyp ýokary okuw mekdebiniň uçurymy boldular.
«Türkmen ýaşlary tertipliligi bilen, okuwa yhlasly çemeleşmesi bilen we ýokary okuw mekdebiniň medeni we sport durmuşyna işjeň gatnaşýanlygy bilen tapawutlanýarlar» - diýip, rektor belledi.
Öz gezeginde, Türkmenistanyň Kazandaky baş konsuly Türkmenistanyň raýatlary tarapyndan alynýan bilimiň hili bilen, olaryň okuw gurşawyna uýgunlaşmagy bilen gyzyklandy.
ORIENT habarlar
