Haýyr-sahawat ýygnamasy boýunça «Türkiýe – bir ýürek» çäresine badalga berildi
Türkiýäniň öňdebaryjy telewizion we radioýaýlymlarynyň göni ýaýlymynda we goňşy döwletleriň birnäçesinde «Türkiýe – bir ýürek» şygary bilen çäre geçirilýär – diýip, Anadolu agentligi habar berýär.
Türkiýäniň 11 welaýatyna täsir eden ýer titremede ejir çekenlere kömek bermek boýunça haýyr-sahawat aksiýasyny dünýäniň dürli ýurtlaryndan 213 telewizion we 562 radioýaýlymlar goldadylar.
Türkiýäniň wagty bilen 03:10 çenli kampaniýanyň barşynda ýygnalan haýyr-sahawatyň möçberi 115,1 mlrd lira (6 mlrd 106 mln ABŞ-nyň dollaryna) deň boldy.
Türkiýäniň prezidenti Rejep Taýyp Ärdogan telefon arkaly göni ýaýlymyň studiýasyna baglandy. Weýrançylykly ýer titremede heläk bolanlaryň hossarlaryna we ýakynlaryna gynanç bildirip, döwlet baştutany kampaniýanyň barşynda toplanan her bir lira ýer titremede ejir çekenleriň mätäçlikleri üçin ulanylar – diýip, belledi.
Türk halkyna goldaw hökmünde göni ýaýlyma bütin Türkiýeden syýasatçylar, işewürler we artistler, şeýle hem türk hem-de daşary ýurt sport jemgyýetçiliginiň meşhur wekilleri çykýarlar.
Olaryň arasynda – BMG-niň Baş sekretary Antoniu Gutteriş, Albaniýanyň premýer-ministri Edi Rama, Türkiýäniň Beýik milli mejlisiniň başlygy Mustapa Şentop we başgalar bar.
ORIENT habarlar
