DÖM-nyň we innowasiýalaryň baglanyşygyny Oguzhan adyndaky uniwersitetiň halkara maslahatynda ara alyp maslahatlaşýarlar
Oguzhan adyndaky Inžener-tehnologiýalar uniwersitetinde «Durnukly ösüşiň maksatlary: ýaşlar syýasaty we innowasion tehnologiýalar» atly halkara ylmy-amaly maslahat açyldy.
Ýokary okuw mekdepleriniň mugallymlaryndan we talyplaryndan, şeýle hem ýurduň ylmy intelligensiýasyndan başga çärä dünýäniň 23 ýurdundan 50 golaý wekiller gatnaşýar. Hususanda, Russiýanyň, Hytaýyň, Ýaponiýanyň, ABŞ-nyň, Germaniýanyň, Rumyniýanyň, Azerbaýjanyň, Nigeriýanyň we beýleki ylmy toparlaryň wekilleri gatnaşýarlar.
Maslahatyň maksatnamasy ylmy işläp-düzmeler babatyndaky özara hereket, innowasion tehnologiýany döwlet işjeňliginiň ähli ugurlaryna ornaşdyrmakda ýaşlaryň eýeleýän orny ýaly meseleleriň ara alnyp maslahatlaşylmagyny öz içine alýar.
Daşary ýurtly myhmanlar şekilli aragatnaşyk arkaly bu ýokary okuw mekdepde amala aşyrylýan taslamalar bilen, talyplaryň kiberhowpsuzlyk, emeli intellekt babatyndaky, PÜ-ni, web-saýtlary we ş.m. döretmekdäki gazananlary bilen tanyşdyryldy.
Plenar mejlisden soňra halkara maslahaty — «Nanotehnologiýalar, himiki tehnologiýalar we biotehnologiýalar», «Maglumat we kommunikasion ulgamlar we kiberfiziki ulgamlar», «Innowasion ykdysadyýet we ynsanperwer ylymlar» bölümlerinde dowam etdirildi.
Maslahatyň maksatnamasyna laýyklykda daşary ýurtly wekiller gaýtadan dikeldilýän materiallara we energiýanyň çeşmelerine, DÖM-na ýetmekde ýaşlar syýasatynyň ornuna, gurluşykdaky innowasion tehnologiýalara bagyşlanan hasabatlar bilen çykyş ederler. Olar şeýle hem Türkmenistanda kaliýniň sulfatyny öndürmegiň mümkinçilikleri, lagym suwlaryny gaýtadan işlemek, 5G-ni ulanmagyň geljegi barada hem gürrüň bererler. Maslahat 16-njy fewrala çenli dowam eder.
ORIENT habarlar
