Amerikanyň ilçihanasy türkmen mugallymlaryny hünärini ýokarlandyrmak üçin ABŞ-a çagyrýar
ABŞ-nyň Türkmenistandaky ilçihanasy Fulbraýt 2024 bilim grantlarynyň çäklerinde hünäri ýokarlandyrmak Maksatnamasyna gatnaşmaga çagyrýar – diýip, Amerikanyň diplomatik wekilhanasynyň saýty habar berýär.
Gatnaşyjylar 2024-nji ýylyň ýanwarynda ýa-da sentýabrynda ABŞ-a giderler. Olar öz okadýan dersi boýunça bilimini çuňlaşdyrmaga, okatmagyň täze usullary bilen tanyşmaga, okuw gollanmalary we tekstler bilen işlemäge mümkinçilik alarlar, şeýle hem Kolumbiýa okrugyndaky Waşingtonyň amerikan mekdepleriniň birinde 40 sagatlyk tejribelik geçmäge mümkinçilik alarlar.
Alty hepdelik maksatnamanyň stipendiýasy wiza tölegini, ABŞ-a uçuşlaryň çykdajysyny, akademiki maksatnamanyň çykdajysyny, ýaşamak we iýmit çykdajylaryny, saglyk ätiýaçlandyrmasyny, ulagy, göz öňüne tutulmadyk çykdajylary, kitaplary, gollanmalary we seminarlary doly öz içine alýar. Şeýle hem ABŞ-da bolmagyň tutuş dowamynda dürli medeni çäreler meýilleşdirilendir.
Bäsleşige bäş ýyl iş tejribesi bolan mekdepleriň we bilim merkezleriniň mugallymlary, 12 ýaşdan 18 ýaşa çenli mekdep okuwçylaryny okadýan mugallymlar, öz garamagynda goşmaça synplar bolan we iş wagtynyň 50% orta we ýokary synplary okatmaga berýän mugallymlar; maksatnama gutarandan soňra ýene-de bäş ýyl mugallym bolup işlemegi meýilleşdirýän mugallymlar gatnaşyp bilýärler.
Ýüz tutmany diňe Türkmenistanyň raýaty bolan ýokary bilimli we TOEFL-dan iň azyndan 450 ball (test göz öňünde tutulýan) alanlar tabşyryp bilýärler. Mekdep administrasiýasynyň wekilleriniň, ýokary okuw mekdepleriniň mugallymlarynyň we hususy repetitorlaryň Maksatnama gatnaşmaga hukugy ýokdur.
Ýüz tutmalary 2023-nji ýylyň 2-nji apreline, sagat 23:59 çenli şu salgylanma boýunça tabşyryp bolýar. Has jikme-jik maglumat bilen şu ýerde tanşyp bolýar.
