Türkmenistanda Ählumumy döwürleýin synyň dördünji tapgyry boýunça milli hasabatyň taýýarlanyşyny ara alyp maslahatlaşdylar
Türkmenistan Ählumumy döwürleýin synyň dördünji tapgyry boýunça milli hasabaty taýýarlaýar – diýip, BMGÖM-nyň Türkmenistandaky edarasynyň metbugat habarynda mälim edilýär.
Resminamanyň birinji taslamasyny Türkmenistanyň adam hukuklary we halkara ynsanperwerlik hukugy babatdaky halkara borçnamalaryny ýerine ýetirmek baradaky Pudagara komissiýasynyň Iş toparynyň agzalarynyň gatnaşmagynda iki günlük seminarda gözden geçirdiler.
Ara alyp maslahatlaşmalara şeýle hem halkara bilermeni Tomas Baranowas hem gatnaşdy. Hasabaty taýýarlamagyň çäklerinde ol Türkmenistanyň raýat jemgyýetiniň wekilleri bilen aýratyn duşuşyklary geçirdi. Türkmenistan Ählumumy döwürleýin syn baradaky dialoglara gatnaşýar, onuň işinde adam hukuklaryny goramagyň milli ulgamyny kämilleşdirmek boýunça maslahatlary alýar.
« Ählumumy döwürleýin syn – bu ajaýyp iş bolup, ol BMG-niň agzasy bolan ähli 193 döwletde adam hukuklary bilen baglanyşykly ýagdaýyň döwürleýin synyny öz içine alýar» – diýip, BMGÖM-nyň Türkmenistandaky hemişelik wekiliniň orunbasary Tomisa Paowiç belledi.
ORIENT habarlar
