Sazandalar, suratkeşler, pälwanlar – Eýranyň Aşgabatdaky Medeniýet günleri neneňsi ýatda galar
Aşgabatda Eýranyň Medeniýet günleri baýramçylyk konserti bilen açyldy – paýtagtyň Mukamlar köşgünde goňşy ýurduň sungat ussatlarynyň çäresi aýdym-sazly çykyşlardan başlandy.
Eýran Yslam Respublikasynyň Türkmenistandaky ilçisi Golam Abbas Arbab Hales tomaşaçylary mübärekläp, bu çäräniň iki ýurduň arasynda medeni gatnaşyklary hem-de döredijilik alyşmalary giňeltmäge we çuňlaşdyrmaga gönükdirilendigini belläp, hemmeleri 13-nji fewralda Aşgabatdaky şekillendiriş sungaty muzeýinde geçirilejk Eýranyň çeper we amaly-haşam sungatynyň eserleriniň sergisine çagyrdy.
Mukamlar köşgüniň sahnasynda guralan konsertde aýdym-saz toparlary we aýdymçylar çykyş edip, gadymy aýdymlary we tanslary, şeýle hem häzirki zaman eserlerini hödürlediler. Kirişli halk saz guralynda rok usulynda ajaýyp çykyşy ýerine ýetiren zenan tomaşaçylarda uly täsir galdyrdy.
Artistlerden başga-da, sportuň milli görnüşleriniň türgenleri hem, şol sanda pälwanlar görkezme çykyşlarynda öz ussatlyklaryny görkezdiler. Olar uly agyrlykdaky daşlary eginleriniň üstünden ýeňillik bilen her tarapa geçirdiler.
Şeýle hem şu hepdede aşgabatlylara we paýtagtyň myhmanlaryna Eýran sungatynyň sergisinden başga-da, türkmen diline terjime edilen eýran filmleri hem-de Eýranyň milli tagamalarynyň festiwaly görkeziler.
Çärelere gatnaşmak üçin türkmen paýtagtyna EYR-niň medeniýet we yslam ugurdaşlygy ministri geldi.
ORIENT news
