Türkiýäniň Türkmenistandaky wiza merkezi ýer titremesinde ejir çekenlere kömek üçin ýorgan kabul edýär
14-nji fewralda Türkiýäniň Türkmenistandaky wiza merkezi bu ýurduň günorta-gündogarynda bolan werançylykly ýer titremede ejir çekenlere kömek üçin ýorganlary kabul edýär. Bu barada Türkiýäniň Türkmenistandaky ilçisi Togan Oral özüniň sosial torlarynda ýazdy.
«Bu 14-nji fewralda söýýänleriňiziň ýüregini ýer titremede ejir çekenlere kömek üçin ugradylan ýorgan bilen ýylat», - diýlip aksiýa gatnaşmaga çagyrýan posterde aýdylýar.
Türkiýe ugradylmak üçin ulanylmadyk, galyň gyş ýorganlary sellofana oralyp kabul edilýär.
Türkiýäniň Türkmenistandaky wiza merkezi şu salgyda ýerleşýär: Aşgabat ş, G. Kulyýew köç., bina 88. Ýorganlar sagat 13:00 den 17:00-ä çenli kabul edilýär.
Magnitudasy ýedi balldan geçýän güýçli ýer titreme 6-njy fewralda Türkiýäniň günorta-gündogarynda bolup geçdi. Häzirki wagtda tebigy betbagtçylygyň pidalarynyň sany 29 müň 605 adamdan geçdi. Betbagtçylyk zolagyndan 147,9 müň adam başga ýere çykaryldy. Şunuň bilen bir wagtda 3,5 müňden gowrak adam goňşy Siriýanyň çäginde bolup geçen ýer titremäniň pidasy boldy.
ORIENT habarlar
