Kazanda musulman kinosynyň halkara festiwaly geçiriler
5-9-njy sentýabr aralygynda Tatarystan Respublikasynyň paýtagtynda musulman kinosynyň XIX Kazan halkara festiwaly geçiriler. Her ýyl kinoforumyna Russiýadan, şeýle hem ýakyn we uzak daşary ýurtlardan onlarça filmler gatnaşýarlar. Kino festiwalyň guramaçylyk topary bäsleşige öz işlerini hödürlemäge taýýar bolan kinostudiýalardan haýyştnamalary kabul edilendigi barada yglan etdi. Bellige alyş 2023-nji ýylyň 1-nji iýunyna çenli dowam eder diýip, festiwalyň metbugat gullugy habar berýär.
Bäsleşigiň maksatnamsyna doly göwrümli we gysga göwrümli oýun hem-de dokumental filmler girer. Şeýle hem festiwalyň eminler topary “Milli bäsleşik” diýen tapgyry döretdi. Parahatçylyk döredijilik, ynanç-ygtykat we ynsanperwerlik maksatlaryny özünde jemleýän umumadamzat, ruhy-ahlak gymmatlyklary we medeni däp-dessurlary şöhlelendirýän rus hem-de daşary ýurt eserleri kinotaslamasyna girizilip biliner.
Kino festiwalyň işewürlik maksatnamasynyň çäklerinde Kazanyň sebitleýin kino bazary, kinotaslamalaryň halkara bäsleşigi, kino mekdepleriniň forumy, şeýle hem kino düşürmek ulgamynda görnükli işgärleriň ussatlyk sapaklary geçiriler.
Musulman kinosynyň XIX Kazan halkara festiwaly Russiýanyň müftileriniň geňeşiniň başlangyjy boýunça 2005-nji ýylda esaslandyryldy we “Russiýa – Yslam dünýäsi” strategik nukdaýnazarlar topary bilen hyzmatdaşlykda Tatarystan Respublikasynyň prezidenti Rustam Minnihanowyň goldaw bermeginde geçirilýär.
ORIENT news
