Prezident Serdar Berdimuhamedow Mary welaýatyna iş saparyny amala aşyrdy
Sişenbe güni prezident Serdar Berdimuhamedow Mary welaýatyna iş saparyny amala aşyryp, birnäçe ýolbaşçylar bilen iş maslahatyny geçirdi hem-de sebitiň meýdanlarynda oba hojalyk işleriniň barşy bilen tanyşdy.
Iş maslahatynyň dowamynda oba hojalyk toplumyna gözegçilik edýän wise-premýer Annageldi Ýazmyradow bugdaý ösüdrilip ýetişdirilýän ekerançylyk meýdanlaryndaky işleriň ýagdaýy, gowaça ekişine taýýaarlyk görülişi, şeýle hem derýalarda suwuň durnukly akymynyň üpjün edilişi, olaryň kenarlarynyň berkidilişi we suwaryş ulgamlarynyň arassalanylyşy barada hasabat berdi.
Ministrler Kabinetiniň Başlygynyň orunbasary Çarymyrat Purçekow welaýatyň ykdysadyýetiniň senagat ulgamy, şol sanda elektroenergetika pudagy boýunça hasabat berdi.
Iş maslahatyna, şeýle hem Döwlet Howpsuzlyk geňeşiniň sekretary, goranmak ministri Begenç Gündogdyýew, Ahal welaýatynyň gurluşygy baradaky döwlet komitetiniň başlygy Derýageldi Orazow we Mary welaýatynyň häkimi Döwranberdi Annaberdiýew gatnaşyp, prezidente özlerine ynanylan jogapkärli ugurlarda alnyp barylýan işler barada hasabat berdiler.
Serdar Berdimuhamedow ýolbaşçylaryň her birine geljekde ýerine ýetirmeli işler boýunça görkezmeleri berdi hem-de seredilen meseleler boýunça ilkinji nobatdaky wezipeleri kesgitledi.
Prezident Mary welaýatyna saparynyň barşynda sebitde möwsümleýin oba hojalyk işleri, şol sanda gowaça ekişine niýetlenen ýerlerde taýýarlyk işleri alnyp barylýan meýdanlary synlady.
Şeýle hem döwlet Baştutany Garagum derýasynyň kenarlaryny berkitmek boýunça geçirilýän çäreleriň barşy bilen tanyşdy. Şol işlerde ýer gazyjy kuwwatly tehnikalar ulanylýar.
ORIENT news
