Konserte taýýarlykda sahnanyň arkasynda: brodweýli artistler näme hakda gürrüň berýär
Aşgabatda Keýt Bass we Aaron Ýang amerikan artistleriniň ýerine ýetirmeginde meşhur brodweýli aýdym-saz ussatlarynyň eserleri ýaňlanar. Olar dirižýor Resul Gylyjowyň ýolbaşçylygyndaky Döwlet simfoniki orkestriniň ýerine ýetirmeginde aýdym aýdarlar.
Artistler Türkmenistana ABŞ-nyň “Serhetden daşarda amerikan sazlary” (American Music Abroad) atly medeni maksatnama boýunça geldiler hem-de türkmen paýtagtynda bir konsert bererler. Konsert 10-njy fewralda Mukamlar köşgüniň sahnasynda geçiriler.
Onuň maksatnamasy dürli-dürli bolar – Brodweýiň “Westsaýdskaýa istoriýa”, “Prizrak opery”, “Alladin”, “Kandida”, “Piraty Karibskogo morýa” ýaly meşhur aýdym-saz eserleri we ençeme beýlekiler ýaňlanar. Diňleýjilere garaşylmadyk ýakymly sowgatlar hem garaşýar.
Mysal üçin, konserte Türkmen döwlet hory-da, şeýle hem milli konserwotariýanyň talyplary – Döwran Şammyýew we Dünýägözel Begaliýewa gatnaşarlar. Olar amerikan artistleri bilen bilelikde dünýä meşhur aýdym-saz eserlerini ýerine ýetirip, tomaşaçylary göýä brodweý teatrlarynyň sahnasyna atararlar. Tomaşaçylara nämeleriň garaşýandygy hem-de konsert maksatnamasynyň nähili boljakdygy barada artistler Keýt Bass we Aaron Ýang ORIENT-iň žurnalistine beren interwýusynda şeýle gürrüň berdiler:
-Maksatnama dürli-dürli bolar, hemmeleriň aňynda bolan we köplenç gaýtalanyp ýörlen brodweýli aýdym-saz usatlarynyň hem-de beýleki meşhur kompozitorlaryň eserlerinden ajaýyp we görnükli saz kompozisiýalary ýaňlanar. Şeýle hem, biz disneý filmlerinden eserleri ýerine ýetireris. Olaryň atlaryny biz atlandyryp durjak däl, ol tomaşaçylar üçin garaşylmadyk sowgat bolar, ýöne, bir zady aýdaýyn – konsertde her bir diňleýji üçin saz bolar. Şoňa görä-de, çykyşlara tomaşa etmäge geljek her kim bu agşam orkestriň artistleriniň we sazandalarynyň hut özi üçin çykyş edýändigini duýar diýip, brodweýli sazanda we artist Aaron Ýang gürrüň berýär.
Aýdymçy zenan, kompozitor hem-de aýdymlaryň awtory Keýt Bassy bolsa onuň özboluşly sesi we ýerine ýetirijilik ussatlygy üçin dünýä metbugaty “dünýäde iň oňat wokalçy zenanlaryň biri” diýip atlandyrdy. Ol opera aýdymçysy we belli bir döwürde Nýu-Ýorkuň filarmoniýa orkestriniň aýdymçysy bolupdy, Karnegi-hollda, Brodweýde hem-de onuň çäklerinden daşarda teatr sahnalarynda “Emmi” we “Toni” baýraklaryna hödürlenen konsertleri ençeme gezek berdi. Keýt dört albom çykardy, konsert maksatnamalary bilen tutuş dünýä boýunça syýahat edýär hem-de onuň çykyşlary tomaşaçy orunlaryň janköýerlerden doly ýagdaýynda geçýär.
-Men “Karusel” brodweý mýuziklinden çykyş etdim. Aşgabat konsertinde şu we brodweýiň beýleki meşhur çykyşlaryndan kompozisiýalar ýaňlanar. Meniň aýdym-saz äleminde gadamlarym teatrlaryň we orkestrleriň çäklerini giňeldýär hem-de maňa dünýäniň dürli ýurtlarynda çykyş etmäge, medeniýetara maksatnamalaryna gatnaşmaga we täsin aýdym-saz taslamalaryny hem-de kollaborasiýalaryny döretmäge mümkinçilik berýär.
Biz Türkmenistana ýene-de dolanyp geleris hem-de hyzmatdaşlygymyzy dowam ederis diýip, örän umyt edýärin. Mysal üçin, bilim beriş häsiýetli gyzykly taslamany döretmek we türkmen talyplary bilen işläp görmek isleýärin. Täze saz ýazmak, zehinli sazandalar bilen bilelikdäki çykyşlary guramak we ýene-de ençeme köp gyzykly işleri etmek höwesim bar – diýip, Keýt Bass pikirlerini paýlaşdy.
-Biz Aaron ikimiz Alýaskadan. Aşgabat biz üçin öýümiziň bir bölegine öwrüldi – belent daglar ak şäheri gurşap alýar, bu ýeriniň peýzažy bize mähriban ýerleri ýatlatdy. Türkmenler bolsa “mähribanlyk we dostanalyk” diýen sözler bilen hakydamda janlanýar. Men bu ýerde birnäçe günüň dowamynda tanşan adamlarymyň köpüsi bilen hemişelik dost bolup galjakdygyma ynanýaryn – diýip, amerikaly artist zenan aýtdy.
Aaron Ýang, öz nobatynda, ençeme ýyllyk syýahatçy hökmünde tejribesi bolup, dünýäniň köp ýurtlarynda bolandygyny we haýsy ýere baranynda hem hemişe milli tagamlardan dadyp görýändigini belledi. Türkmen tagamlary diýseň haýran galdyrýandygyny, gaýtalanmajak şeýle naz-nygmatlary ýene-de bir gezek dadyp görmek üçin ol bu ýurda uly isleg bilen dolanmakçydygyny aýtdy.
“Elbetde, türkmen kärdeşlerim bilen bilelikdäki aýdym-saz taslamasyny ýerine ýetirmek isleýärin. Biziň bu meýillerimizi durmuşa geçirip biljekdigimize umyt edýärin” diýip, ol ORIENT-e beren interwýusynda aýtdy.
Konsert paýtagtyň Mukamlar köşgünde 10-njy fewralda geçiriler. Onuň başlanýan wagty 18:00, konserte girmek mugt.
Gulya Geldyeva
Video: Suleiman CHARYEV
