Türkiýäniň günorta-gündogarynda güýçli ýer titremesi bolup geçdi (täzelendi)
Türkiýäniň günortasynda ýerleşýän Kahramanmaraş welaýatynyň Pazarjyk etrabynda magnitudasy 7,4 ball bolan uly ýer titreme bolup geçdi – diýip, Adatdan daşary ýagdaýlaryň öňüni almak we ýok etmek baradaky müdirligiň (AFAD) habaryna salgylanyp, Anadolu agentligi habar berýär.
Täzelenme: bar bolan maglumatlara görä betbagtçylygyň netijesinde 284 adam heläk boldy, 2,3 müňden gowrak adam ejir çekdi. Ýurtda howpuň iň ýokary derejesi yglan edildi.
Ýet titreme Gaziantep şäherindäki ÝUNESKO-nyň Bütindünýä mirasynyň sanawyna goşulan taryhy galany ýumurdy.
Türkiýäniň häkimiýetleri halkara kömegini almak babatda ýüz tutdular. Öz gezeginde, Türkiýäniň HG-niň baş ştaby betbagtçylyk zolagyna halas edijileriň toparyny eltmek üçin iki sany uçar ugratdy.
Ýer titreme daňdan ýerli wagt bilen sagat 04:17 bolup geçdi. Ondan soňra sagat 06:30 çenli 42 sany ýer yranmasy gaýtalandy; olaryň iň güýçlüsiniň magnitudasy 6,6 balla deň boldy. Yrgyldamalar Hataý, Osmaniýe, Adyýaman, Gaziantep, Şanlyurfa, Diýarbakyr, Malatýa we Adana welaýatlarynda duýuldy.
ORIENT habarlar
