Aşgabatda zenanlaryň arasynda küşt boýunça Türkmenistanyň çempionatynyň finaly geçirilýär
Aşgabatda zenanlaryň arasynda küşt boýunça Türkmenistanyň çempionatynyň ýokary ligasynyň oýunlaryna badalga berildi. Aýlaw ulgamy boýunça geçýän ýaryş häzirki günde ýurduň iň güýçli küştçi zenanlarynyň 14-sini bir ýere jemledi. Olaryň her biri ýaryşa gatnaşyjylaryň hemme beýlekileri bilen küşt tagtasynyň başynda duşuşarlar. Aýal-gyzlar birinji liga, 20 ýaşa çenli gyzlaryň arasynda geçirilen çempionat we munuň öňýanyndaky ýokary liga bilen birlikde, dürli kwalifikasion ýaryşlardan saýlanylyp alyndylar.
Häzirlikçe geçirilen iki tapgyrdan soň, oýnalan iki oýny-da utup, 2 utukdan toplan küştçi gyzlaryň üçüsi öňde barýar. Olar – FIDE-niň ussady Läle Şöhradowa, Gülmire Seýilhanowa (ikisi-de Lebap welaýatyna wekilçilik edýär) hem-de 20 ýaşa çenli ýetginjek gyzlaryň arasynda çempion bolan Merýem Agajanowa (Aşgabat).
Olardan ýurduň häzirki çempiony, FIDE-niň ussady Jemal Öwezdurdyýewa ýarym utuk yzda barýar. Ol birinji tapgyrda ýarym utuk ýitirendigine garamazdan, ýaryşda ýeňiş gazanjak esasy garşydaş hasaplanmagyny dowam edýär. Birinji tapgyryň döwleriniň biriniň wideo-seljermesini şu ýerden görüp bolar.
1-nji fewralda geçiriljek 3-nji tapgyrda 1-nji orundan 4-nji orun aralygyny eýeleýän hemme öňdebaryjylar bir-biri bilen duşuşarlar. Läle Şöhradowa Merýem Agajanowa bilen oýnap, 20 ýaşa çenli gyzlaryň arsynda ýakynda geçirilen çempionatda utulmagynyň öwezini dolmaga synanyşar. Jemal Öwezdurdyýewa bolsa ak mallarda çykyş edip, häzirlikçe utuk ýitirmän gelýän Gülmire Seýilhanowany ýeňmäge synanyşar.
Ýaryşyň ýeňijilerinden Türkmenistanyň zenanlar ýygyndy topary dörediler. Çempionat 11-nji fewrala çenli dowam eder.
ORIENT news
