Türkmenistanda zorlukly ekztremizmiň öňüni almakda pudagara çemeleşmäni ara alyp maslahatlaşdylar
Zorlukly ekstremizmiň öňüni almak boýunça başlangyçlary durmuşa geçirmekde pudagara çemeleşme Türkmenistanyň Zähmet we durmuş taýdan goramak ministrliginiň we BMG-niň Ösüş Maksatnamasy tarapyndan guralan seminarynyň barşynda ara alnyp maslahatlaşyldy – diýlip, guramanyň beýanatynda habar berilýär.
Okuw seminary Aşgabatda we ýurduň welaýatlaryndaky bäş synag merkezinde geçirildi.
Oňa gatnaşyjylar – ministrlikleriň we pudaklaýynedaralaryň, jemgyýetçilik guramalarynyň, welaýatlaryň we paýtagtyň häkimlikleriniň wekilleri, şeýle hem maslahat beriş toparynyň agzalary jemagatlaryň baştutanlarynyň we maşgala agzalarynyň zorlukly ekstremizmiň öňüni almakdaky ornuna, jynsy taýdan kemsidilmä garşy göreş çärelerine garadylar. Bilermenler ýaşlaryň gatnaşmagynyň giňeldilmegine, olaryň zorlukly ekstremizm boýunça habardarlygyny we başarnyklaryny ýokarlandyrmaklyga çagyrdylar.
ÝB-niň Gazagystandaky sebitleýin wekiliýetiniň wekili Nikola Françesketti soňky ýyllarda zorlukly ekstremizmiň ýaýramagynyň halkara jemgyýetçiliginiň parahatçylygy we howpsuzlygy pugtalandyrmak baradaky tagallalaryna çynlakaý howp salýandygyny aýtdy we onuň jemgyýetleriň we ilatyň gowşak toparlarynyň, ylaýta-da ýaşlaryň arasynda öňüniň alynmagy ilkinji nobatda berjaý edilmeli mesele bolup durýandygyny belledi.
Seminar Ýewropa Birleşigi tarapyndan maliýeleşdirilýän «Aziýada zorlukly ekstremizme garşy durnuklylygy berkitmek (STRIVE Asia): ÝB—BMG Bilelikdäki hyzmatdaşlyk» bütindünýä taslamanyň Ýurt komponentiniň çäklerinde gurnaldy. Ol döwlet we jemgyýetçilik guramalaryna ýaşlaryň arasynda zorlukly ekstremizmiň öňüni almak bilen baglanyşykly maksatlara ýetmek arkaly ýerli jemgyýetleriň durnuklylygyny berkitmäge gönükdirilendir.
27-nji ýanwarda şu taslamanyň çäklerinde milli hyzmatdaşlar bilen tegelek stol geçiriler, onda jemgyýetçilik birleşmeleriniň üsti bilen ýaşlara goldawbermek başlangyçlary, ýaş nesili jemgyýet üçin ähmiýetli kararlaryň kabul edilişine çekmek ýaly meseleler ara alnyp maslahatlaşylar.
ORIENT habarlar
