Türkmenistanda hususy türkmen-russiýa işewürlik mekdebi dörediler
«Türkmen-Tranzit» türkmen kompaniýasy we Russiýanyň «Sinergiýa» korporasiýasy Türkmenistanda hususy işewürlik-mekdebini döretmek barada ylalaşyk baglaşdylar.
Resminama «Türkmen Tranzitiň» direktory Faruh Tagiýew we «Sinergiýanyň» prezidenti Wadim Lobow gol çekdiler. Täze bilim meýdançasyny Türkmenistanyň Senagatçylar we telekeçiler birleşmesiniň (TSTB) häzirki hereket edýän işewürlik-mekdebiniň binýadynda dörederler.
«Sinergiýa» korporasiýasy Russiýanyň iri bilim birleşmeleriniň biridir, ol bilim hyzmatlarynyň doly görnüşlerini, şol sanda okuw hyzmatlaryny halkara derejesinde ýerine ýetirýär. Häzirki wagtda Ýewropanyň we Aziýanyň öňdebaryjy ýokary okuw mekdepleri we işewürlik mekdepleri - «Sinergiýa» holdinginiň hyzmatdaşlarydyr.
Russiýanyň bu korporasiýasy mekdep okuwçylaryny we ululary programmirleme, isleg bildirilýän IT-hünärleri boýunça bilim almagy gurnaýar, hünär kämilleşdiriş kurslaryny we dolandyryş işgärleri üçin okuwlary geçirýär, şeýle hem kiçi we orta telekeçiligiň wekilleri üçin bilim maksatnamalaryny döredýär we ş.m. işler bilen meşgullanýar.
ORIENT habarlar
