«Türkmenaragatnaşyk» agentliginiň Politehniki orta hünär okuw mekdebinde uçurym dabarasy geçirildi
25-nji ýanwarda Türkmenistanyň Ministrler Kabinetiniň ýanyndaky Ulag we Kommunukasiýalar agentliginiň «Türkmenaragatnaşyk» agentliginiň Politehniki orta hünär okuw mekdebinde 2020-2023 ýyllarda bilim alan talyplaryň uçurym dabarasy geçirildi.
Dabaranyň başynda orta hünär okuw mekdebinde has ýokary netijelere eýe bolan we tapawutlanan talyplara hormat hatlary gowşuryldy. Dabara orta hünär okuw mekdebiniň talyplarynyň aýdym-sazly, folklor we degişme çykyşlary bilen dowam etdi. Şowhunly çykyşlar dabara gatnaşyjylarda ýatdan çykmajak täsir galdyrdy.
Çykyşlarda Gahryman Arkadagymyzyň asylly başlangyçlaryny dowam etdirýän Arkadagly Serdarymyzyň adyna alkyş sözleri aýdyldy. Çünki, talyp ýaşlaryň kämil bilim almagy, döwrebap tehnologiýalardan baş alyp çykmagy, olaryň täze pikirleriniň we çemeleşmeleriniň durmuşa ornaşdyrylmagy üçin ýurdumyzda ähli mümkinçilikler döredilýär.
Ýurdumyzda ýaş nesiller barada edýän aladalary üçin «Türkmenaragatnaşyk» agentliginiň Politehniki orta hünär okuw mekdebini tamamlan talyplar Hormatly Prezidentimize tüýs ýürekden sagbolsun aýtdylar.
Şeýle hem, häzirki döwürde durmuşyň ähli ugurlarynda giňden ulanylýan täze tehnologiýalary özleşdirmek bilen innowasiýalara esaslanýan täzeçil çözgütleri işläp düzüp, ýurdumyzyň abraýyny artdyrmaga saldamly goşant goşjakdyklaryna ynandyrdylar.
ORIENT news
