Azerbaýjan bilen Hytaý strategik hyzmatdaşlygy giňeltmäge ylalaşdy
Azerbaýjanyň Prezidenti Ilham Aliýew çarşenbe güni Bakuda Hytaýyň daşary işler ministri Wan I bilen duşuşdy. Wan I Hytaýyň Başlygy Si Szinpiniň ýörite wekili hökmünde Aziýada özara hereket we ynanyşmak çäreleri boýunça maslahatynyň ýedinji sammitine gatnaşmak üçin Azerbaýjana bardy.
Aliýew iki ýurduň arasyndaky syýasy ynamyň we ykdysady hyzmatdaşlygyň ýokary derejesini belläp, geçen ýyl Hytaýa amala aşyran saparynyň dowamynda gazanylan ylalaşyklaryň yzygiderli durmuşa geçirilýändigini aýtdy.
Onuň sözlerine görä, Azerbaýjan Hytaý bilen energetika, ulag infrastrukturası we beýleki ugurlarda hyzmatdaşlygy giňeltmegi maksat edinýär hem-de hytaý kompaniýalarynyň maýa goýumlaryny goldaýar. Şeýle hem “Bir guşak, bir ýol” başlangyjynyň we Orta geçelge bilen bagly taslamalaryň ähmiýeti bellenildi.
Azerbaýjanyň Prezidenti iki ýurduň raýatlarynyň arasyndaky gatnaşyklary giňeltmek üçin özara wizasyz düzgüniň mümkinçiliklerinden has giň peýdalanmaga çagyrdy we “bir Hytaý” ýörelgesine ygrarlydygyny tassyklady.
Wan I bolsa Hytaýyň Azerbaýjan we Orta geçelgäniň beýleki gatnaşyjylary bilen hyzmatdaşlygy çuňlaşdyrmaga hem-de ýurduň ösüşinde uzak möhletli strategik hyzmatdaş bolmagyny dowam etdirmäge taýýardygyny aýtdy.
Hytaýyň daşary işler ministri taraplaryň möhüm meselelerde biri-birini goldaýandygyny belläp, Pekiniň halkara we sebit meseleleri boýunça Baku bilen utgaşdyrmany güýçlendirmäge taýýardygyny aýtdy.
Saparyň dowamynda Wan I Azerbaýjanyň daşary işler ministri Jeýhun Baýramow bilen hem gepleşik geçirdi.
CCTV+ habar bermegine görä, taraplar söwda-ykdysady, ulag we maýa goýum hyzmatdaşlygyny giňeltmek hem-de halkara we sebit meseleleri boýunça utgaşdyrmany güýçlendirmek meýlini tassykladylar.
