Hançžoudaky Aziýa oýunlarynda agyr atletika boýunça ýaryşlaryň senesi yza süýşürildi
Hançžoudaky Tomusky Aziýa oýunlarynda agyr atletika boýunça ýaryşlaryň geçirilýän senesi üýtgedildi. Indi agyr atletikaçylar 2023-nji ýylyň 30-njy sentýabryndan 7-nji oktýabry aralygynda ýaryşarlar.
Bu karara agyr atletika boýunça Aziýa oýunlarynyň we agyr atletika boýunça Halkara federasiýasynyň dünýä Çempionatynyň ýaryşlarynyň arasyndaky aralygy açmak üçin gelindi.
2024-nji ýylda Parižde geçiriljek Olimpiýa oýunlaryna saýlama bäsleşik bolan planetanyň birinjiliginiň geçirilmegi 2023-nji ýylyň 2-nji sentýabryndan 17-nji sentýabryna çenli aralykda Saud Arabystanyň Er-Riýad şäherinde meýilleşdirilendir.
Agyr atletikanyň Aziýa federasiýasy (AWF) ýaryşlaryň senesine gaýtadan seretmek baradaky karary “jebisligiň görkezilişi” diýip atlandyrdy.
Aziýa oýunlary - 2022 Hançžouda 2023-nji ýylyň 23-nji sentýabryndan 8-nji oktýabry aralygynda geçiriler. Türkmen türgenleri, şol sanda agyr atletikaçylar, bu ähmiýetli ýaryşa güýçli taýýarlyk görýärler.
ORIENT habarlar
