Türkmen önümleri Russiýanyň iri söwda torlarynyň tekjelerinde ýer alyp biler
Türkmenistanda öndürilen önümler Russiýanyň iri söwda torlarynyň tekjelerinde ýer alyp biler – diýip, RF-nyň kiçi we orta telekeçiligi ösdürmek boýunça Federal korporasiýanyň baş direktorynyň orunbasary Nikita Bansekin Aşgabatda geçýän türkmen-rus biznes-forumynyň meýdançasynda beýan etdi.
«Bu X5, «Metro», «Magnit», «Globus» ýaly iri torlar we köp-köp beýlekiler bolup biler. Meniň pikirimçe, türkmen önümleri ol ýerde uly islege eýe bolar, diňe bir oba hojalyk önümleri däl, şeýle hem senagat, dokma we beýleki köp önümler» – diýip Bansekin aýtdy.
Korporasiýanyň baş direktorynyň orunbasary kanunçylyga laýyklykda döwletiň gatnaşýan Russiýanyň iri kompaniýalary özlerine gerekli önümiň azyndan 25%-ni kiçi we orta kärhanalardan satyn almalydyrlar diýip belledi. Bu bazar hem türkmen kompaniýalary üçin açyk – olar döwlet satyn almalarynda bäsleşik esasynda gatnaşyp bilýärler.
Şunuň bilen bir wagtda, Russiýa tarapy ikitaraplaýyn söwdanyň artmagynda ikitaraplaýynlyga bil baglaýar diýip, Bansekin nygtady we Russiýanyň kiçi we orta kärhanalarynyň hem türkmen bazaryna öz ýoluny tapjakdygyna umyt bildirdi.
Çykyş ediji şeýle hem türkmen we rus kompaniýalarynyň arasynda söwdanyň ösdürilmegine ýardam edip biljek sanly platformanyň bardygy hakynda aýtdy «Önümçilik kooperasiýasy we söwda». Häzir platforma synag kadasynda işleýär.
ORIENT habarlar
