Arkadag şäherinde Ahal welaýatynyň baş metjidiniň düýbüni tutdular
Arkadag şäherinde Ahal welaýatynyň baş metjidiniň düýbüniň tutulyş dabarasy boldy - diýip, bu çärä gatnaşan Tatarystan Respublikasynyň prezidentiniň resmi saýty habar berýär.
Birbada 15 müň musulmanyň namaz okamaga mümkinçiligi boljak metjidiň umumy meýdany 34,5 ga deň bolar. Onuň gurluşygyny “Altyn” hojalyk jemgyýeti alyp barar.
“Bu diňe bir Türkmenistan üçin däl, eýsem bütin yslam dünýäsi üçin uly wakadyr. Metjitden başga, bu ýerde medrese hem gurlar. Bu örän möhüm. Biz öz däplerimize, dinimize aýawly garamaly – olarsyz biziň geljegimiz bolmaz. Türkmenistanda bu ugurda netijeli işler gurnalýar” – diýip, Tatarystanyň prezidenti Rustam Minnihanow metjidiň düýbüniň tutulyş dabarasynda çykyş edende aýtdy.
Çärede şeýle hem Aşgabatda akkredirtirlenen musulman ýurtlaryň ilçileri, şeýle hem türkmen parlamentiniň agzalary, ministrlikleriň we edaralaryň ýolbaşçylary, welaýatlaryň häkimleri, medeniýet ulgamynyň we habar beriş serişdeleriniň wekilleri gatnaşdylar.
ORIENT habarlar
