RF we Türkmenistan Hazaryň kenarýakasynyň ugrundan awtoulag ýoluny gurmagy maslahatlaşýar
RF we Türkmenistan bilelikdäki ýol taslamasyny – Hazar deňziniň gündogar kenarýakasynyň ugrundan awtoulag ýoluny gurmagy maslahatlaşýar diýip, RF-niň premýer-ministri Mihail Mişustin penşenbe güni Aşgabatda geçirilen türkmen-rus işewürlik forumynda çykyş edende habar berdi.
“Hazar deňziniň gündogar kenarýakasynyň ugrundan awtoulag ýoluny gurmak häzir ara alnyp maslahatlaşylýan geljegi uly bilelikdäki taslamalaryň biridir” diýip, ol aýtdy.
Şunda premýer-ministr halkara ulag gatnawlarynyň döredilmegine aýratyn ähmiýet berilýändigini nygtady. Hususan-da, ýurtlar “Demirgazyk-Günorta” halkara ulag geçelgesiniň ösdürilmeginiň hem-de ony geçirijilik kuwwatyna doly çykarmagyň üstünde işleýärler.
Häzirki güne çenli Türkmenistan bilen Russiýa Federasiýasynyň arasynda ulag we logistika ulgamynda ikitaraplaýyn resminamalaryň 20-sine gol çekildi. “Demirgazyk-Günorta” halkara ulag geçelgesi hakynda Ylalaşyga Türkmenistanyň goşulyşmagyna degişli işler başlandy.
ORIENT news
